Shillong,11 Naitung:
Kham mynshuwa ki 13 sengbhalang ki la kyntu ia ka sorkar ba kan pyntreikam noh ia kita ki ain kiba ka la kular ha ka jingiakynduh ba khadduh eh ia ki sengbhalang ha u iaiong mynta u snem, kiba long ki ain ki ban ia pli kat bym pat lah ban pyn treikam ia ka Inner Line Permit.Hadien ba la kynjah jar la kumba katto katne bnai, u Myntri Rangbah ka jylla u Dr.Mukul Sang ma mynhynnin ka sngi u la pynbna ba ka sorkar ka la thaw ia ki lai tylli ki komiti ki ban pyrkhing ia ka jingwan tuid kyrthep ki mynder sha kane ka jylla.
Hadien ba u Dr.Mukul u la pynbna ia kitei ki lai tylli ki komiti ki ban peit ia kata ka ain kaba ym pat don kyrteng haduh mynta ruh , kum ka ain ka ban pyrkhing mynder, ha ka jaka ka ILP, ka la mih bun tylli ki jingkylli na u ba bun ba lang hato kitei ki komiti eksamin ain u Dr.Mukul ki la pynhun ne-em ia ki sengbhalang.
Halor katei ka bynta u Rupang u la ioh ban ia kren bad u nongialam jong ki 13 seng uba long ruh u Preident Rangbah ka FKJGP u bah Joe Marwein, ban kylli na u hato kitei ki komiti eksamin ain ka sorkar ka la pynhun ne-em ia ka jingdawa ki sengbhalang ban pyntreikam kyrkieh noh ia ki ain pyrkhing mynder. Na ka liang u bah Joe u la ong ba haduh mynta ym pat lah ban kynthoh eiei namarba ka dei ka kam kaba hap ban ia pyrkhat lang baroh, u la ong ba lashai ka sngi kan don ka jingiakynduh ki 13 seng ryngkat bad ki Rangbah Shnong jong ki shnong bapher bapher ban ia pyrkhat shaphang kita ki ain pyrkhing mynder bad ban pyrkhat ruh halor ki jingthaw komiti u Dr.Mukul.
Lah ban pynkynmaw ba ha ka jingiakynduh ba khadduh eh ki 13 seng bad u Myntri Rangbah ka jylla, ki la shim ia ka rai kaba ia hunlang baroh arliang kata ban pyntreikam kyrkieh noh da kawei pat ka ka ain pyrkhing mynder, namarba ka sorkar kam lah ban pdiang ia ka ILP. Lah ruh ban pynkynmaw ba ki nongialam sengbhalang hadien ka jingiakren bad u Dr.Mukul ha ka jingiakren bad ki nong thoh khubor, ki la ong ba kata ka ain kaba ki la ia mynjur lang ka bym pat don kyrteng ka ia syriem kum ka ILP, ne ka Modified ILP. Katba ha ka jingiakynduh bad ki nongthohkhubor mynhynin ka sngi u Dr.Mukul u la bitar ban ong ba katei ka ain ka dei ka modified ILP bad u la ong ba kam don eiei ka jingiakren ia kata ka ILP ne Modified ILP hynrei da kawei pat ka ain kaba ia ka kyrteng u la ong yn sa peit pat hadien.
Phi don ban ong eiei?