Nongpoh, 09 Naitung:
Ka bording elektrik kam dei shuh ka mat jingeh ba ki paidbah ki iakynduh tang khyndiat sngi ne kynta, hynrei ha kine ki sngi kane ka mat ka la long kawei na ki mat iakren jong kiba bun ba lang ba ka la wanrah jingeh bha ia ki paidbah kiba ju pyndonkam ia ka ha ki ïing ki sem.
Kane ka mat iakren ka la pynlong ruh ia ka Synjuk ki Dorbar Shnong Saiden Area (SDSA) ban leit iakynduh hynnin ka sngi ia ki ophisar ka MeECL ba la ialam da u Bah E.K Lapang, chairman ryngkat bad kiwei ki nongkitkam kynthup ia u Bah R.W Shylla, Bah M.G Kharshanlor, u Bah R.R Makdoh bad ki Rangbah Shnong, ha kaba ki la kynduh markhmat ia u SDO ka Nongpoh Sub Division ban iakren bad u halor katei ka mat.
Ha katei ka jingiakynduh, ki heh katei ka Synjuk ki la buh syndon ia ki mat jingdawa jong ki hakhmat ki ophisar katei ka tnat bording kaba don ha Nongpoh, kynthup ruh ia ka Junior Engineer ka Revenue kaba la batai shaphang ki rukom thymmai ba la ai sha ki paidbah ban siew ia ka bai bording (electricity bill).
Na ka liang ka synjuk ka la dawa ruh ba katei ka tnat bording kaba don ha Nongpoh ba ka dei ban pyntikna ba ka jingwan ka bording sha ki shnong ki thaw ban ai jingshai ia ki ïing ki sem jong ki paid nongshong shnong ka dei ban ym thud satia.
Ki nongialam ka synjuk ki la kynnoh ruh ba ka shnong Dulongnar bad ka thaiñ jong ka baroh kawei ka la mad ia ka jingduh ia u nongtrei (lineman) jong ka bad ba ka tnat bording kam pat thung briew satia ha ka jaka jong utei u lineman uba la shongthait na ka kam, u Bah Boldwin Sumer bad ba katei ka kam ka la sah thylli haduh mynta.
Ki la ong ruh ba ka shnong Umjarasi lei kam biang satia ia u transformer haduh mynta namar u dei u single phase bad donkam ban pynkhlaiñ ia ka bording ha katei ka shnong namar wat ki CFL bulb ruh kim lah kit shuh ban ai jingshai ia ki ïing ki sem jong ki nongshong shnong.
Kumta ki la dawa ba dei ban thung lineman thymmai noh ha Dulongnar bad ban buh ne bujli thymmai ruh ia u transformer ha Umjarasi uba lah ban kit ia ka bording kaba khlaiñ, khnang ba ki paidbah kin ym mad satia ia ka jingduh ding elektrik ba man la ka por.
Ki la bynrap ruh ba ha Nongpoh la i donkam ban don noh ia ka sub station, namar kumba long mynta katei ka thaiñ baroh kawei ka don tang 33KV, katba ka jingdawa jong ki shnong ban pyndonkam ia ka bording ka long kaba jur haduh katta katta.
Khatduh eh ki la bynrap ruh ba ka tnat bording nangne shakhmat ka dei ban pyntikna ba ka jingwan ka bording elektrik ka dei ban long kaba tikna bad kam dei satia ban thut bad lada lap ba ka bording kam lah satia ban ai jinghun ia ki paidbah kiba pyndonkam ia ka, na ka liang ka Synjuk bad ki paidbah kim banse ban pyrkhat da kiwei ki lad ba tyngeh ban pynsngewthuh ia katei ka tnat treikam bording kaba la long shisha ka diengpyngkiang ia ki paidbah nongshong shnong.
Phi don ban ong eiei?