Shillong, 9 Naitung:
Ki sengbhalang na ka thain Ri Bhoi sepngi ba kynthup ia ka WRBDC, FKJGP, HANM, CORP, RBYF bad ka WRBDSO ki la thaw noh da ka Western Ri Bhoi Joint Action Committee (WRBJAC) ban iatreilang hapoh kawei ka shatri na bynta ban rat dyngkhong ia ki jingsah dien jong ka thain Ri Bhoi sepngi.
Ia kane ka rai la shim ha ka jingialang kaba la long ha iing dorbar ha shnong Patharkhmah ha kane ka lah sngi U Blei.
Ha ka jingialang ka WRBJAC ka la rai ban khot ia ki ophisar ka MeECL ba kin wan ban pynshai sha ki paidbah halor ka jingduh light kaba la ktah ia ki paidbah bad ki longiing kiba donkam ia ka jingshai ha ka por mynmiet myniong.
“Ngin khot iakren shwa ia ki ophisar ka MeECL ba kin wan ban pynshai ia paidbah halor ka jingbym poi thikna ka light”, la ong u bah Najim Kharmalki uba long u Chairman ka WRBJAC. U la ong ba kiwei pat mat kiba iadei bad ka surok, ka network bad ki skim pynroi ka JAC kan sa shong pyrkhat ban ai da ka dorkhas sha ka sorkar jylla ban pynsngew ia ka jingeh ki paidbah.
La jied bad pynshkem ruh ia ki nongkitkam ka JAC kynthup ia u Chairman bah Najim Kharmalki (WRBDC), Vice Chairman bah Kodios Thongni (HANM), Secretary bah Lawlyer Sangkli (FKJGP), Asstt Secretary bah Gabreil Diengdoh (WRBDC), Organising Secretary bah Apnas Thngkhiew (FKJGP) Publicity Secretary bah Lumkur Lapang (CORP) bad Advicer bah Snomik Kalwing Ex MLA, Jirang Constituency lem bad 11 ngut ki dkhot ka Committee.
Phi don ban ong eiei?