Shillong, 13 Jylliew:
U Conrad K Sangma, U MP jong ka National People’s Party (NPP), mynta ka sngi, u la kyntu jur ia ka sorkar jylla ba ialam khmat da u Dr Mukul Sangma ban shim ia ki lad ba donkam ban ai jinghikai bad pynshai bad kumjuh ru ban iarap pisa ia ki dkhot jong ki kynhun kieng atiar kiba la wan pyndem wait jong ka ri Lum Garo.
“Shibun ki dkhot jong ki kynhun kieng atiar bapher bapher ki la wan ban phai ban sdang ia ka jingim ba thymmai hynrei ka long ka long kaba donkam na ka sorkar ruh ban ai ia ki kum ka prokram ai jinghikai ban pynsngewthuh lym kumta ka lah ban wanrah ia ka jingphai dien biang jong ki sha ki kam pyntriem” la ong u Conrad ha ki lad pathai khubor hynne ka sngi ha ka jingialang ha ophis trei kam ka NPP ha Lachumiere.
U MP na Tura u la ong ruh ba ka sorkar ka dei ban don ia ka jingkitkhlieh ban shim ia ki sien jam kiba biang eh ban ai ka jingsngew skhem bad jingshaniah ia kito kiwei pat ki dkhot kieng atiar kiba dang don ha ki kynhun kiba khlem pat wan ban pyndem wait.
Ha kawei pat ka liang halor ka jingkyntait jong ka sorkar ban ia kren ia suk bad ka kynhun kieng atiar na ri Lum Khasi ka Hynniewtrep National Liberation Council (HNLC), u Conrad ua la ong ba ka liang na ka NPP ka sngewdei ba ka sorkar kan khot ia kren ia ktei ka kynhun khnang ban ioh wanrah noh ia ka suk ka sain.
Ha ka taiew ba la dep, u Myntri Rangbahduh ka Jylla Meghalaya u Dr Mukul Sangma u la ong ba kan ym kano kano ka jingiakren bad katei ka kynhun kieng atiar. “Lada ngi kwah ban weng ia ki jingeh ngin hap ban bujli ia ki ain ki kyndon da ka jingthmu ban wanrah ia ka jingshong suk,” la ong u Conrad. Ha ka taiew ba la dep u Dr Sangma da kaba kyntait ban iakren bad ka HNLC, u la pynpaw ruh ba ka jingthmu ban iarap ia uno uno u dkhot ba la pyndem wait ka dang don hapdeng ka jingiaid lynti.
Phi don ban ong eiei?