Shillong, 7 Naitung:
U bah Fredrick Khar mawphlang, Vice President barim jong ka Khasi Students Union (KSU)ula pynmih kyrwoh mynta ka sngi, ha kaba ula ong ba ka jingleit jong u ban pyn iasoh bad ka seng HNLC, ka dei da ka mon sngew bha jong u bad ula kyntait ruh, ba ka jingleit iasoh jongu bad katei ka seng, ka dei na ka daw, ba ka don ka jingiapher jingmut bad ki nongialam jong ka seng KSU.
U bah Fredrick, ula kren shai shuh shuh, da kaba ong,ba um kwah ban im ia ka jingim, ha ka jing shah pyniaid jong ka sorkar Hindustan. “Nga kwah ban ieng ban iada ia ka hok jong ka jaitbyn riew, ha ki kyndon treikam jong ka seng HNLC bad nga kyrpad ruh ia kidkhot jong ka seng KSU, ba lada jia ba ngim ia tylli tang ha ka jingialam jong kawei ka seng, kumno ba ngin lah ban ia tylli bad ki 13tylli ki seng, kiba iakhun, na ka bynta ban pynioh ia ka jingdawa ILP ha ka Jylla”.
Ka jingiakhun na bynta ban pyntreikam ia ka ILP, ka dei ka jingiakhun kaba khraw ia ka jaitbynriew Hynniewtrep bad halor kane ka phang, U Bah Kharmawphlang, u ong ba ka sorkar BJP, ka don ia ka jingthmu mynta ban weng noh ia ka article 370 ha Jammu and Kashmir, na ka bynta ban ailad ia ki nong India, ba kin thied jaka puta, ba kin ia poi kha bad ki trai shnong bad ba kin seng kam khlem kano kano ka jingpynthut ne ka jing pynwit bad katei kajuh ka sorkar BJP, ka thmu ban buh ia ka article 370 ha Goa, ban khanglad ia ki briew kiba nabar, ba kin thied jaka puta ha katei ka Jylla bad utei u nongialam jong ka seng HNLC, u kren shai ruh ba um tip ia kaei ka jingmut, kaba don ia ka sorkar BJP, ha kaba iadei bad ka jing pyntreikam ia ka ain ILP ha Manipur bad ha Meghalaya ruh kumjuh.
U bah Kharmawphlang, u kren diaw ruh, halor ka jingmih ka jing or pait jong ka seng ha kine ki sngi, ha kaba ula ong ba na ki 13tylli ki seng, ka don ka jingiapher jingmut tang ha ka liang jong ka KSU. “Nga suba ba ka don kaei re kaei kaba ki briew jong ka sorkar,ki la ioh ban rung ban pyn ia pait ia ka KSU, halor ka mat jong ka ILP. Ka kyntien ban pynbeit ia ka ain ILP, ka dei ka buit ban pynmih ia ka jing ia pher jingmut, ka jing ia thaw kynhun bad ka jing ia isih, ong shuh utei u nongialam barim ka seng.
La ong shuh shuh da U bah Fredrick, ba ka ain ILP, ka dei kaju bad kumta kaba dei ban sngewthuh, ka long ba katei ka ain EBFA (Eastern Bengal Frontier Act 1873), ka dei beit ka ain bad ka bym don jingmut eiei ban dang pynkylla ia ka. Lah ban pynkylla ia katei ka ain, kumba la leh ha Nagaland bad ha Mizoram, katba kum ka jinglong jingman jong ki briew ha kitei ki jaka.
Ka ain EBFA, ka don ia ka jingthmu ban peit ia ka jingwan jong ki briew kiba nabar, namar ba ha kito ki por, ym don skul bad ym don samla pule kiba wan na shabar, ym don nongtrei ki ban wan na shabar, namar ym don ophis satia bad ka trei ka ktah lane ka khaii pateng ruh kam don bad ka jingdonkam nongtrei ruh ka duna bha.
La ong U bah Kharmawphlang, ba lada jia ba ym pynbeit ia ka ain EBFA, kumta kan long ka bym don jingmut eiei ruh em, namar ba mynta ka daw, kaba kongsan, ka long ban khanglad ia ka jingwan tuid ki briew kiba nabar.
La kyrpad namarkata da U Bah Fredrick, ia ka KSU bad ki 13tylli ki Sengbhalang, ba kin poi sha ka jingiabeit bad ia sngewthuh jingmut lang, ba u paidbah, un nym sngewthuh bakla ia kane ka jingiapher jingmut kaba don ha ki. Ka khubor ba khadduh, na utei u nongialam, ka long ruh ban U Khynriam, U Pnar, U Bhoi, U Lyngngam bad U War, ki dei ban don ka jing ia tylli kawei, wat la ki don la ka jong ka jong ka jingsngew halade shimet ne ha ka jinglong jingman jong ka seng sain pyrtheiruh kumjuh.
Phi don ban ong eiei?