Nongpoh, 09 Naitung: Ka Hynñiewtrep Achik National Movement (HANM), Ri-Bhoi district, mynta ka sngi ka la leit ban jurip ia ki katto katne ki jaka sumar nongpang ha ki thaiñ Ri-Bhoi mihngi, hadien ba la ioh ia ki jingujor na ki paidbah katei ka thaiñ. Katei ka seng hapoh ka jingialam jong u Samla Bryan Sohkhlet, president ha ryngkat bad ka jingsynran lang kiwei ki nongialam na ka Bhoirymbong Circle ba kynthup ia u Bah M Kharbuki, president bad u Bah H.S Syngkli, general secretary, ki la leit jurip shuwa ia ka Bhoirymbong CHC kaba la wanrah jingeh palat ia ki paidbah nongpang kiba wan shim dawai na katei ka jaka sumar pang.
Hadien kata, ki la leit ban jurip pat sa ka Mawlasnai PHC, ha kaba hangtei ruh ki la lap ia ka jingshitom palat ki paidbah ba wat tang u doktor ruh um don ban shakri ia ki paidbah kiba donkam ban ioh ia ka jingkoit jingkhiah na ki met ba pang ba swai jong ki. U Samla Bryan haba kren bad u nongthoh khubor, u la kynnoh ba ka Bhoirymbong CHC watla ka la long kawei na ki CHC kaba ka sorkar jylla lyngba ka tnat ka koit ka khiah bad ka NEIGRIHMS ki la don ka jingiakren sngewthuh jingmut ban pynbiang ia ki doktor na ka bynta ban shakri ia ki paidbah man la ka sngi, pynban katei ka jingiakren imat kam poi shaei shaei ruh, kaba sngewthamula ka long ba kita ki doktor kumba la pynmang kat haduh mynta ki sngi kim pat poi satia kaba la wanrah jingkulmar ia ki paidbah kiba donkam ban ioh ia ka koit ka khiah. U la ong ruh ba ka seng ka lap ba nalor ki doktor, kitei ki jaka sumar nongpang ki la wanrah jingeh ia ki paidbah namar ka jingbym biang ki jaka thiah nongpang, ki jaka leit shabar, ki dawai dashin, bad kiwei kiwei ki la long ki bym biang nadong shadong. Ha kaba iadei bad kane, na ka liang ka HANM ka kyrpad bad kyntu jur ia ka tnat ka koit ka khiah bad ia u Myntri ba dei peit ia katei ka tnat ba kin phai khmat sha katei ka thaiñ na ka bynta ka bha ka miat ha ka koit ka khiah jong ka thaiñ bad ha district hi baroh kawei.
Phi don ban ong eiei?