Da ka jingwan ka elekshon MLA na Sohiong, ka la poi sha ka kyntien jingpynkut bad kata ka long, ba ki riew kyntiap seng, ki la rem lut plain artad bad katei ka lah ban dei ka khubor, kaba sngew bang lane sngew blad ia ki arngut ki MLA jong PDF, kiba dang shu leit pyniasoh NPP dang shen eh.
Ban shu kynmaw, U bah Samlin, u dei u MLA jong ka seng HSPDP, hynrei, ula leit pyn iasoh NPP, ha shwa ka elekshon MLA 2023; nangta U Bah Hamlet Dohling, U bah Jason Mawlong, U Bah Kimfa Marbaniang, U bah Mohendro Rapsang, U Ma Shitlang Pale, U bah George B Lyngdoh nalor kiwei pat bad kitei ki leit klim party ha shwa ka elekshon bad ki ia rem lut baroh.
Ka elekshon ha Sohiong, kam dei ka elekshon kaba rit, hynrei ka dei kaba baroh kawei ka jylla, ka la iashim bynta lang bad ka NPP lei, ka la sei lut, ia la ki jong ki snar jongka, naduh u myntri rangbah, ki symbud myntri rangbah, ki myntri sorkar bad baroh hi plain bad ka UDP ruh, ka la leh lem hi kumta, ha kaba U President jong ka seng lem bad kiwei ki myntri sorkar, ki MLA, ki la ia dem hi diap, ha katei ka elekshon bad kumta ka jingjop ruh, ka pyni shai, ba u paid jong ka Sohiong, u jied da ka jingieid ia u kyrtong jong ka seng UDP bad ba um shym la shah pynngop satia ha ka pisa lane ha kiwei pat ki bor pynthame.
Lyngba ka jingrem jong ka NPP ha Sohiong, ka pyni shai, ba u paidlang ka Khasi Hills, um shym la pdiang satia ia katei ka seng, namar ba ha baroh kawei ka West Khasi hills, ka South West, ka Eastern West, ym don MLA NPP satia bad nangta sa ka East Khasi hills bad ka nongbah Shillong, ki don tang arngut, kiba la dei lypa ki snar ha ka politiks bad katei kan dei ka dak, kaba ima shibun ia katei ka parti, khamtam, ba ka dang iai bteng ban ialam ia ka sorkar ha ka sien kaba ar bad ka jingsngew pyrshah lane kata ka anti incumbency factor, kan dang jur bad sa ka jingmih jong ka ishu roster, reservation policy bad kiwei, kan nang pyn soh kyrdot ia katei ka seng, ha ki sngi ban sa wan.
Kam dei tang kata, hynrei, ka jingstad jong ka Sohiong, ka long kaba ym nud shuh ban ia tainia eiei bad kata ka dei, ba ym tang ba ki la kyntait ia ka NPP, hynrei kiwei ki seng heh jong ka India, lada dei ka BJP, lane ka TMC, ki la shah pynjah kyrteng syndon.
Phi don ban ong eiei?