Silchar, 13 Naitung:
Namar ka jingkhang ban shalan dewiong na Meghalaya, mynta ka mih ka jingeh, ba ka jaka shna kot sada jong ka Hindustan Paper Corporation Ltd (HPCL), kaba don ha Ca char, kan hap ban khang noh shen bad halor katei ka phang, ki nongtrei jong ka Cachar Paper Mill, ki la thoh sha u myntri rangbahduh, ba un shim ia ki lad ki lynti ban pynbiang dewiong ia katei ka karkhana, ba katei ka karkhana, kan nym hap ban khang noh shen satia.
Ki nongtrei jong ka jaka shna kot sada ha Cachar, ha ka lama jong ka Cachar Paper Project Workers’ and Employees’ Union bad ka Cachar Paper Mill Officers’ and Supervisors’ Association, ki la thoh da ka dorkhas sha u myntri rangbahduh bad kumjuh sha u myntri ki kam karkhana, ha ka sngi palei bad kitei ki nongtrei, ki la ong ba lada kim ioh dewiong noh mar mar, na Meghalaya, kaba ka jing jngai ka long tang 25 Kilometre, kumta ka jingshna kotsada ha ka distrik Hailakandi jong ka Assam, kan hap ban khang noh tang hapoh une u bnai uba mynta.
Katei ka dei ka karkhana, kaba heh tam, kaba don shathie jong ka Assam, ka dei kaba shna ia ki kot sada ban thoh bad ban shon kot ruh, kaba la trei kam naduh u snem 1998. Ia mynta ki don 1,200ngut ki nongtrei bad da ki lak ngut kiba im ja, na katei ka kam shna kotsada.
Ki nongtrei jong katei ka karkhana shna kot sada, ki iathuh ba ka jingpynmih kot sada, ka dei kaba haduh 1,00,000 ton ha ka shisnem shisnem bad kumta ka donkam ia u dewiong kumba 550 haduh 600 ha ka shisngi shisngi bad mynta, namar ba ka jingdon dewiong, ka long tang 12,000 million tonne, kumta ka jingtreikam katei ka karkhana,kan lah ban neh, sa tang shibnai eiei mynta.
La ong shuh shuh, ha katei ka dorkhas, ba ka jingdon jong u siej mynta ha katei ka karkhana, ka long 90,000 MTG kaba shongdor T.35klur bad lada jia ba pynsangeh noh ia ka jingtrei, kumta kitei ki siej, kin sa pyut noh bad kan long ka jingduh kaba khraw ia katei ka karkhana.
La ong ruh da ki nongtrei, ba ka lad ban kit dewiong sha katei ka karkhana, kam don satia na kawei pat ka lynti, hynrei, kaba suk bad kaba jan eh, ka dei beit lyngba ki par dewiong, kiba na ka Jylla Meghalaya.
Phi don ban ong eiei?