Shillong,13 Naitung:
Ka jingiakynad kaba jur kala jia ha ka janmiet sngi saitjain hapdeng ki nongshong shnong jong ka Upper Mawprem bad katto katne ki bar jylla kiba la wan sha katei ka shnong da ka jingthmu ban ialeh sngewbha ha ka ïing jong kawei ka Long kmie Khasi.
Haba iakren bad uwei na ki nongthoh khubor, u Bah D. Wah lang, Asst. Rangbah Shnong ka Upper Mawprem, u la ia thuh ba katei ka jingjia ka la sdang naduh ki katto katne snem mynshuwa, ha kaba kitei ki bar jylla ki ju wan bad pynlong ia katei ka ïing sah jong ka Kong Santa Rynjah kum ka jaka leh sngewbha bad ha kajuh ka por ruh ka ju don ka jingtem jingrwai kaba la palat ia ka por kaba la buh da ka aiñ jong ka shnong.
Utei u rangbah shnong u la iathuh ba ha ka step jong ka 12 tarik mynta u bnai ha ka por kumba 2.00 baje eiei, katba ka jingrwai ba la pynheh kam pat kut satia ha katei ka ïing, ki paidbah jong ka shnong kim banse ban leit ha ka ban kyntu ia katei ka longïing ban pynsangeh noh ia ka jingtem, namar ba ka por kam shah shuh. U la ong ruh ba ha ka por ba ki briew jong ka shnong ki la poi ha ïing jong ka Kong Santa, kitei ki 5 ngut ki bar jylla kiba dei ruh ki bar ri ki la sdang ban pyni bor ia ki briew jong ka shnong bad ka la poi ruh sha u pud ha kaba uwei na kitei ki ‘ bar ri’ u la sdang ban ktah kti ia ki khynnah samla ka shnong.
La iathuh ba haba ki longkmie jong ka shnong ki la iohi ia kane, ki la leit da ka jingkyrmen ban tem noh ia katei ka jingjia, pynban kitei ki ‘ bar ri’ kim shym la map satia ia ki ruh bad ki la pynmih da ki ktien khlem akor pyrshah ia ki. Ki longkmie jong ka shnong ki la iathuh ruh ba kane kam dei ka sien kaba nyngkong ha kaba kitei ki ‘ bar ri’ ki la wan ha katei ka ïing bad ki la kynthoh ruh ha kajuh ka por ka trai ïing hi ka ju mlien ban wan ialam ia ki shynrang briew ha ïing jong ka bad ba ka long kum ka nongkhaïi kaba ju pyniaid ïew ha ka ia die ia thied ia ki kynthei.
Naka liang jong ka shnong, ka la khot hajir ia kitei baroh kiba la shah kem bad ka la rai ban ai jingsneng ruh da kaba tyngeh, namar da ka jingailad ia uwei ne kawei, kan pynshlur pat ia kiwei ha ka ban leh ia kum kitei ki jait kam. Ki nongshong shnong ki la iathuh ruh ba don napdeng jong kitei ki ‘ bar ri’ u bym lah satia ban mih na kane ka jylla namar u don ha ka ‘ case’ ba la bynshet halor jong u ha kaba iadei bad ki kot ki sla ba kynthup ia ka ‘ Passport’, ‘ Visa’ bad kiwei kiwei. Ha katei ka jingjia ki pulit ki la kem noh ia 8 ngut ki briew ba kynthup ia 5 ngut ki ‘ bar ri’, 2 ngut ki kynthei lem bad ka trai jong katei ka ïing, ka Kong Santa Rynjah.
Phi don ban ong eiei?