Shillong, 13 Naitung:
Ki Rangbah Shnong kiba don ha kane ka nongbah Shillong, ki la pan por shi bnai na ki sengbhalang ban pule bniah ia ki ain pyrkhing rung ia ki briew nabar. Ki rangbah shnong ki la hap ban pan por hadien ba ki la ioh sngew ia ka jingbatai jong ki sengbhalang ia ki ain ba ki la phah sha ka sorkar ban tehlakam ia ka jingwan rung ki briew nabar.
Kumba 60 tylli ki Dorbar Shnong ha kane ka nongbah ki la wan ban sngap ia ka jingiakren pynshai halor ki ain ban tehlakam ia ki mynder ha ka jingialang kaba la long ha Community Hall ka Jaiaw Shyiap & Lum Pyl lon ha kane ka sngi Saitjain.
Ha kane ka jingialang, ki sengbhalang ki la shim ia ka bynta ban pynshai sha ki nongialam shnong halor ki ain ba ki la dep phah sha ka sorkar jylla ha ka 29 tarik Iaïong mynta u snem.
Haba iakren bad ki nongthoh khubor hadien jong ka jingiakynduh bad ki Rangbah Shnong, u President ka Khasi Students’ Union ( KSU) u Bah Daniel Khyriem u la pynshai ba ki kyndon ba ki 13 tylli ki Sengbhalang ki la tyrwa sha ka Sorkar ban pyntreikam ki dei kiba khlaiñ bad biang eh ban pyntreikam na ka bynta ban tehlakam ia ka jingioh lad ki briew ba nabar bad ki mynder ban rung sha kane ka Jylla.
Phi don ban ong eiei?