Shillong, 13 Naitung:
Ka CSWO ka la ong ba ka kaiphod halor ka jingshah pynshitom ki 12 ngut ki kynthei ha Tura ba la pynmih da ka Meg halaya State Commission for Women (MSCW) ka long kaba shah shiliang bad khlem pynshong nong rim katkum ka jingshisha.
Ha ka kyrwoh ba la pynlait sha ki lad pathai khubor hynne ka sngi u Blei, ka president ka CSWO ka Kong Agnes Kharshiing ka la ong ba ka seng ka la ujor ejahar sha u DGP halor ka jingsam ia ka dud ba sniew sha ki ICDS, hynrei na ka liang ki pulit ki khlem leh eiei. Ka tnad Social Welfare ka bitar ia kane bad ka la pyrshang ban buh kput ia ka CSWO, la ong ka Kong Kharshiing.
Ka la ong ba ka CSWO kan nym tuklar ia ka jingtohkit hynrei kan wad ia ki kot ki sla lyngba ka RTI bad kan sngwbha ban ai jingiaroh lada ka Women Commission kan ai ia ka kaiphod kaba khlem iashah liang da kaba shim bad iathuh ia ki jingshisha.
Ka CSWO ka la ong ba don 12 ngut ki kynthei ba shah pynshitom ha Tura hynrei tang 11 ngut ki ioh ia ka medical certificate ba la ai ha kawei na ka jingtohkit. Ia kine ki kynthei la law ia ki sopti jongki hakhmat jong ki shynrang ha Tura Women Police Station bad la shon dur ia ki ha kaba la sam sha ki lad pathai khubor ruh hynrei ka Commission pat kam shym la pynlong ia ka jingtohkit halor kane. La shon dur ia ki khlem ka mon jongki, la ong ka CSWO.
Ka CSWO kam sngewthuh balei ki pulit ha Tura ki la beain ia kitei ki kynthei mynmiet hadien ba la leh ia ka medical examination ha ka 8 tarik Jymmang 2014 bad la shah ia ki ban law ia ki jain ha ka sngi ba bud da kawei ka pulit kynthei ka Janice Sangma da ka jingiarap jong ki shynrang kiba peit bad pynbat ia ki sopti jong kitei ki kynthei ban shon dur kaba la pynjah burom ia ki. Hato kane kam dei ka kam kaba sngew khia ia ka Commission? Hato ka jinglaw jain ha Tura Women Police Station kam dei ka jingleh bein ia ki? Hato lah ban law lyngkhuid ia ki kynthei hapoh Police Station?, la buh jingkylli ka CSWO.
Ka CSWO ka la ong ruh ba ka medical certificate bad ka jingtohkit jong u IAS ophisar u Sadhu ka don 11 tylli ki kaiphod khlem don tarik, ka por kaba dei ban kdew katkum ka ain. Kumno ka Inquiry Commission ka MSCW kan long kaba biang, haba ki jingdkoh ki la paw tyngkrein?, la ong ka CSWO.
Ki pulit kim lah ban kohnguh ia ka hukum jong ki sengbhalang namar ba ki dei ban iaid katkum ka ain hynrei ka jingpynmih kaiphod ka Commission ban iashah ia k pulit ka long kaba sngew phylla.
U DC u la tip ia ka jingdon jong ki kynthei ha iing kawei na ki nongialam sengbhalang hynrei u khlem leh eiei bad hangne ruh ka Commission ka la iashah ia u DC.
U Balsan Marak uba khlad ha ka kti jong ki pulit, namar kane ka jingjia, bad ka don shibun ki jingdkoh bad khlem kdew eiei ia u Marak ha ka kaiphod ka Commission uba khlad na kane ka jingjia bad ka paw ba la don ka jingleh ban iada ia ki pulit kiba donkti ban pyniaid ia ki kam awria ha kaba kawei ka kynthei la shalan sha Goalpara.
Balei khlem kdew ha ka kaiphod ia ka jingwan jngoh u Special Rapporteur NE ka NHRC u Anil Pradhan sha Tura District Jail, ha ka 18 tarik Jymmang 2014 ha kaba ia ka jingtip la ai da ki koidi sha ka Inquiry Committee jong ka MSCW ha Tura. Katkum ka jingiathuh ki koidi, u Anil Pradhan u la pynpaw ia ka jingsngew khia ia ka jinglong u Balsan Marak hynrei u khlem leh eiei ban rah ia u sha jaka sumar. Ka dei tang ha ka sngi kaba bud ka 19 tarik Jymmang ba la rah ia u Balsan sha jaka sumar bad u khlad noh ha ka 20 tarik Jymmang 2014.
Hato kane kam dei ka jingpynkhein ia ka hok briew man briew, la ong ka CSWO.
Lada lah ban ioh ia ki rkod baroh, ka CSWO kan ujor pyrshah ia ki dkhot ka Meghalaya Women Commission halor ki nongrim kynthup ka jingpynjah ia ki sakhi halor ka jingpynshitom ia ki 12 ngut ki kynthei ha Tura, ka jingiada ia ki pulit kiba law jain ia ki kynthei ha police station, bad halor ka jingkhlad kyndit u Balsan hapoh phatok, la ong ka President ka CSWO.
Phi don ban ong eiei?