Shillong, 13 Naitung:
Ka CoRP ka la kam ba ka jingtrei torti jong ka tnad PWD ka sorkar Jylla ka la paw tyngkrein ia ka surok Kyrdem-Khyndew saw kaba la jot bad pra noh tang hadien ar bnai. Ka ka surok ka jngai kumba 10 kilometer.
Hapoh ka jingialam u Working President Bah Bandary Ryntathiang lem bad ki dkhot ka Eastern Zone ryngkat ki nongkitkam ka shnong Sohriewblei kynthup ia u Bah PD Wanbah, Rangbah shnong, Bah Wansbun Rynghang Secretary shnong Sohriewblei, Bah Marius Lamare Rangbah Shnong barim ka shnong Umraling lem bad kiwei ki rangbah ki la jurip ia ka katei ka surok ha ka sngi Saitjain. Ha kane ka jingjurip ki la kam ba ki la lap ba ka rukom pyntrei ka long shisha kaba la leh torti da ka tnad PWD bad u kontrctor tang ban ioh myntoi shimet.
U Bah Ryntathiang ula ong, ba u kontraktor uba la ithuh kyrteng Bah Thomas Nongtdu ula shu trei tang ban dep rukom ha kaba ula siang da ki maw ba la klong na ki wah khlem da rol bha bad kumjuh ruh ka rukom siang rong ruh ka long kaba stang. “Kane ka long ka jingniew bein ia ki paidbah nongkyndong naba ka surok ka la jot noh tang hadien ar bnai ba u kontrator ula pyndep ban siang rong” ula ong.
Ia ka surok la pyntrei na ka skim Special Plan Assistant (SPA) ha ka jinglut kaba T.4 klur tam na bynta 10 kilometer.
U nongialam ka CORP u la ong ba ka jingleh torti ka tnad PWD ka lah ban don eiei sha lyndet bad u kontractor, ula kynnnoh.
“Ka seng ka ai por 1 bnai ia ka tnad PWD ba kan pyndep ban siang rong biang ia ki jaka ba la pra bad u kontractor u dei ban ban trei bha, khnang ba katei ka surok kaba long u budlum ia ka roi ka par jong ka Raid Madan Kyrdem kan long shisha kaba ai jingmyntoi ia ki paidah ha ka lawei ban wan”, u la ong.
Ula ong ba ka seng kan shim khia ban bud dien ia kane ka kam bad kan sa leit ban iakynduh ia ki bor ba halor ka sorkar jylla.
Katba u Bah PD Wanbah Rangbah shnong Sohriewblei ula ong ba katei ka surok ka pyniasoh ruh ia ka Jaintia Hills bad ka Block-II bad kumjuh ia ka shnong Mawlasnai lyngba ka Khyndewsaw.
Ula ong ba ka shnong ka la leit ban ujor sha u Chief Engineer ka tnad PWD halor katei ka jingjia “Kaba sngewsih ka long la mih pynban ki briew kiba leit ban kynshoit ia ki paidbah ha shnong ban pynkhein rangbah shnong ia nga” ong u Bah Wanbah tang namar ba nga leit ban ujor sha ki bor ba halor ka tnad PWD, halor kane ngam sngew eiei naba nga leh na bynta ka jingbha ki paidbah kumba ka shnong ka la ai bor.
Kumjuh ruh ula pynpaw ia ka jingsngew kmen ia ki nongialam ka CoRP kiba la wan ban jngoh ia ka shnong bad jurip lem ia katei ka surok na bynta ka jingbit jingbiang lang jong ki paidbah ka Raid Madan Kyrdem bad ka thain ri habroh kawei.
Phi don ban ong eiei?