Nongpoh, 17 Jylliew:
Hadien ba la mih ka hukum na u Syiem Hima Mylliem ba baroh ki jaka jong ki nongrep ki dei ban pynthymmai noh ia baroh ki dulir jong ki kiba hap hapoh ka jingpeit ka Hima Mylliem, na ka liang ka seng Nongrep Synroplang bad ki nongrep mynta ka sngi ki la leit mihkhmat syndon sha u Chief Executive Member (CEM) ka Khasi Hills Autonomous District Council (KHADC), Shillong.
Ia katei ka jingleit mihkhmat la ialam da u Bah K Suting, president katei ka seng, ha kaba kum u nongialam u la pynpaw ia ka jingmih katei ka hukum na u Syiem ka Hima Mylliem ba baroh ki jaka rep jaka riang ki kper ki phrah jong ki nongrep dei ban pynthymmai ia ki shisien ha ki lai snem, kaba kum ka seng ka ong ba katei ka hukum ka la wanrah ia ka jinglyngngoh ba kumno ki nongrep kiba dei ki trai jaka kin hap ban pynthymmai ia ki dulir jong ki, haba ki la dep ban thied duh ia kitei ki jaka na ki trai jaka ba ki la thied kham mynshuwa.
Kane ka hukum na ka liang ka Seng Nongrep lem bad ki nongrep kim lah satia ban pdiang da lei lei ruh bad ki la buh ia ka jingkyrpad ia u CEM ka KHADC, u Bah Ardent Miller Basaiawmoit ba un tuklar ia kane ka jingeh ki nongrep ha ka district bad kumjuh ruh ia ka Raid Sohkhwai kaba la pynmih ia katei kajuh ka hukum lyngba ka kot khubor ba ka Dorbar Raid kaba la long ha ka 14 tarik Iaiong ka la pynbna iar ba ki briew kiba don jaka puta ki dei ban pynthymmai ia ki dulir jaka jong ki hadien ba la kut ka por hapoh ka lai snem.
Na ka liang u CEM ruh haba kren hakhmat katei ka seng u la mynjur ban pdiang ia kane ka jingkyrpad bad u la ong ruh ba ia kane ka kam na ka liang jong u un sa shimkhia bha ba utei u Syiem ka Hima Myllem bad kiwei pat ki bor ki dei ban pynsangeh ia katei ka hukum jong ki.
Phi don ban ong eiei?