Shillong, 7 Naitung:
Lai ngut ki khynnah bap het na jaka set Juvenile Home kaba don ha Cleve Colony, la ioh biang ban bat ia ki ha ka sngi ba bud. Kine ki khynnah ki la phet na katei ka jaka set ha ka step sngi Thoh dieng.
Ka thymmei khubor ba la iohlum, la iathuh ba uwei la ioh bat ha kajuh ka sngi ha ka por janmiet katba ar ngut kiwei pat la ioh bat ha ka sngi kaba bud.
Hynrei lai ngut kiwei pat ym pat ioh kem satia naduh ba katei ka sngi ba ki la lait phet na katei ka jaka set.
Ha kane ka sngi Thohdieng ha ka por myn step phyrngab hynriew ngut ki khynnah kiba shah set ha katei ka jaka set namar ki kam runar ruser, ki la phet da kaba shim kabu ia ka jinglong jot katei ka jaka set.
Katkum ka khubor ba la iohlum, ka jingioh bat biang ia kitei ki khynnah, ka dei namar ka jingtrei shitom ki nongtrei katei ka tnad ban wad ryngkat ka jingiatreilang bad ki pulit ka nongbah.
Ki khynnah kiba hapoh 18 snem, kiba leh ia ki kam runar, haba ki shah kem, la buh ha katei ka iing na ka bynta ban sneng ban kraw ia ki ba kin kylla kaba mut sha ka jingim kaba khuid bad kaba bha.
Phi don ban ong eiei?