Ka jingtuh umphniang bad khleh um ha shiteng lynti, dei kaba la iaid la bunsnem bha, ong ka Petroleum Dealers

Shillong:Ka Petroleum Dealers Association of Meghalaya (PDAM), mynhynnin ka sngi ka la pynbna ba ka Association ka kyrshan ïa ka jingkhynra bad kem ki Pulit ka Jylla ïa ki katto katne kiba tuh umphniang ha shiteng lynti jong ki surok bah ka Jylla.

Haba kren sha ki Lad pathai khubor u President ka Association u Bah Kennedy Khyriem, ula ïathuh ba kane ka jingïatuh umphniang bad ka jingïakhleh um ha shiteng lynti kala ïaid mynta la bun snem bha bad kane ka la wanrah ïa ka jingduh nong kaba jur ïa ki Petrol pump bad ka jingma ïa ki paidbah kiba pyndonkam ïa ka umphniang.
U Bah Kennedy ula ïathuh ba ka Jylla kam don Petroleum ne Diesel nalade bad ka donkam ban kit na shabar ka Jylla hynrei bun ki Petrol Pump ha Meghalaya ki shah shet ha ki Trok kiba wanrah umphniang na shabar Jylla.

Ula ïathuh ba ki kali kiba kit ïa ki Petroleum bad Diesel ban pynpoi sha Meghalaya ki dei ki jingim jong ki Petrol Pump ki ban pynpoi umphniang sha ki paidbah ka Jylla.
Nalor kane u Bah Kennedy ula ïathuh ba ki Petrol Pump ha Meghalaya ki don ka jaka pyllang umphniang kumba 60 hajar haduh 1 lak Litre katkum ka jingheh ki Petrol Pump.

“Ka don ka jingïatuh umphniang bad ka jingïakhleh um ha ki umphniang bad ki Pulit kila pynlong ïa ka jingtalasi bad kila ïoh kem ruh ïa ki katto katne kiba donkti ha kine ki kam be-aiñ. Ka Petroleum Dealers Association of Meghalaya ka kyrshan ïa kane ka jingleh ki Pulit,” la ong u Bah Kennedy.
U Bah Kenedy ula ong ruh ba ka Association ka kyrshan ïa ka Sorkar bad ïa ki Pulit ka Jylla kiba la trei shitom ban pynduh jait ïa kum kine ki jinglehtuh ïa ka umphniang kali bad pynrem jur lada don kano kano ka jingleh donbor da ki Pulit kumba la kynnoh ka seng North East Petroleum Mazdoor Union (NEPMU).

Haba kyntu ïa ki paidbah, u Bah Kennedy ula ong, “Ki paidbah ka Jylla kim dei ban khuslai namar ka Jylla ka don ka Umphniang ban pynbit pynbiang ïa ka jingdonkam ki paidbah,” la ong u Bah Kennedy.
Lah ban kdew ba ka NEPMU ka la pynbna ban sangeh pynpoi Petroleum bad Diesel sha Meghalaya naduh 29 tarik mynta u bnai da kaba kynnoh leh donbor ki Pulit ka Meghalaya ha ki surok bah ka Ri-bhoi District.