Ka pynlyngngoh ia u nongthoh khubor, ban iohi, ia ka jaka thang briew, kaba ngi lah ban ong, ba ka long da ka stail bad katei ka dei kaba la plie ha ka Sngi Balang ha Rangthylliang – Mawsiang Nongshken – Dewsaw pathaw.
Ka iing, ka dei kaba heh bad kaba don kumba 20 la 18 phut, katba kum ka jing iathuh jong U Rangbah Shnong, Bah J Sohkhlet ha une u nongthoh. Bad nangta, la iathuh shuh shuh, ba ha syndah katei ka iing, ka don ka painkhana, ka jaka buh um bad ka jaka shong thait ia kito kiba leit sha katei ka jaka on thang briew.
Ha katei ka kamra kaba heh, ka don kawei ka thliew, kaba jrong kumba 10 phut tam bad katei ka dei ka jaka ba la mang ban buh pyrshing ia ka met briew, ha kaba la siang da ka nar na sha trai (kaba dei ruh ka jaka ban lum ia ki shyieng jong u nongiap) bad ha khmat jong katei ka thliew, kaba lam noh salit malu mala, la buh da ki dieng thang bad kitei ki dei ki dieng, kiba thang pyningkhong haduh ban da kylla dpei ia ka met jong u briew.
Ka jing phylla jong katei ka jingthang briew, ka long ba mar ia ai ding, na ka bynta kaba sha khmat jong katei ka thliew; ka ding, ka sdang ban pur stet bad nangta ka tdem, ka beh wut wut sha ka jaka, ba don ka met iap bad nangta ka kiew beit beit sha ka thliew, kaba don u atoskhana, uba jrong kumba 40 phut eiei; kumba la iathuh da U Ma Loi Chyrmang, uba dei u misteri, uba thaw ia katei ka Kpep ha Rangthylliang. Ka jingkhlain jong ka ding bad ka tdem, ban thang ia ka met briew, ka shong ha uwei u sainar, uba la teh ha ka jingtap jong ka thliew atoskhana, kaba don ha khlieh duh jong u astoskhana bad lada la pyllait lut ia ka jingtap, ka lyer kan beh stet haduh katta katta, ha kaba wat ki jain phong ruh kin lah ban shah rong sha suin.
Utei u atoskhana, ha ka jingpeit jong une u nongthoh, u don lai bynta, namar ba la ker ha ki lai kyrdan bad ka dei ha kitei ki lai kyrdan, ba ka don ka jingrung jingmih jong ka lyer, ka jingiaid jong ka tdem bad kaba tan lut ia ka tdem na ka jaka thang ban pynmih pat sha khlieh jong u atoskhana, sha ka jingjrong kaba 40 phut.
Na ka jingbatai jong U Ma OR Shallam, President ka Sein Raij bad wat u misteri heh duh, U Ma Loi, la sngewthuh ba ka jingthang ia ka met iap, kan shim por hi hapdeng ar kynta eiei, wat la u ong ba katei ka Kpep, ka lah ban thang pynkylla dpei ia ka met hapoh shi kynta.
U President ka Sein Raij, u iathuh shuh shuh, ba ka Sein Raij, ka don ar ngut ki misteri rangbah, kiba trei ia katei ka kam shnong jingthang bad kitei ki long U Ma Kyrshan Shullai bad nangta sa U Ma Loi Chyrmang bad la iathuh shuh shuh, ba u mawit, uba shna ia utei u atoskhana ruh, u dei uba kyrpang bha, ha kaba hap ban wan kit na Jharkhand, namar ba kine ki mawit, kiba don ha Shillong, Guwahati, kim lah satia ban tan ia ka tdem jong u atoskhana.
La iathuh ba ka jingdonkam dieng, na ka bynta ban thang pyningkhong ia ka met briew kan long tang shi song lane kumba shiphew kilo antad.
Phi don ban ong eiei?