Shillong, 14 Iaiong:
U Deputy Chief Executive Member (Dy. CEM) ka KHADC u Bah Process T Sawkmie u la ong ba baroh ki MDC ki la sngew hun ia ka jing bhah pisa ha ka KHADC bad ka jingmih khubor ba don ki bym hun, kam don shuh mynta.
“Em, mynta kam don eiei shuh ka jing iathnum, baroh la iahun ia ka jingbhah pisa”, la ong u Bah Sawkmie haba iakren bad u nongthoh khubor mynta ka sngi.
U Bah Sawkmie u la kyntait ruh ba ka la don kano kano ka jingpynkhih ia ka shuki CEM u Bah Pynshngain N Syiem namar ka jingbym hun ha ka jingbhah pisa ia ki MDC na ka pisa T.133 klur ba la ai da ka sorkar pdeng.
“Kam don eiei ka jingiakhih ban pynkhyllem shuki CEM ia u Bah Pynshngain, baroh ngi la iasngewthuh jingmut”, la ong u Bah Process.
Kham mynshwa, u Bah Teinwel Dkhar ka UDP, u la kubur ba ki don ki MDC kynthup ki EM ka KHADC kiba leit kyrpad biang na u CEM ka KHADC Bah Pynshngain N Syiem ban kham pynbun shuh ia ka jingai skhim hadien ba kim shym la ioh skhim eiei haduh lai snem mynta.
Hynrei, na ka liang ka UDP ka kyntait ba ka la don kano kano ka jingthmu ban pynkhyllem shuki ia u Bah Pynshngain kum u CEM tang namar ba kim ioh ia ka pisa kumba ki la leit kyrpad biang. “Haba ka Council ka ioh bun, ngi la iashong jingialang para MDC, bad ki katto katne ki EM bad ngi la iathoh sha u CEM ba un pynmang ne bhah pisa kham bun ia ngi. Ngi la ia leit iakynduh ia u CEM hynrei, u la ong ba ngi la wan dier por namar ba la dep phah lut ia ki skhim”, la ong u Bah Teinwel haba iakren bad u nongthoh khubor.
U Bah Teinwel u la kyntait ba ka UDP kan khih met shane shatai ban pynkhyllem shuki tang namar ka jingiabhah pisa. “Ngim don kano kano ka jingthmu ban iapynkhih shuki, hynrei ngi lyngngoh balei ka sorkar ka slem ban phah ia ka kyrteng jong u Bah Donkupar Sumer ban long EM”, la ong u Bah Teinwel.
Phi don ban ong eiei?