Shillong, 13 Iaiong:
U Jumai, ula khie mynta ka janmiet, ha ka por 7.25, ha kaba ka jingkhie jong utei u jumai, ka la pyn her krad ia ki paidbah, kiba don ha ki iing ki sem jongki.
Utei u jumai, uba wan na ka jaka pdeng jongu ha Myanmar bad uba khlain kumba 6.9 ha ka Richter Scale, ula wan ha ka rukom kaba mian mian, hynrei, mar shipor, ula khynniuh beit jrain jrain bad hadien kata, ula sdang ban pynjem biang mian mian bad u sa jah noh syndon.
La antad, ba ka jingkhie jumai, kan long kumba shi minit tam eiei, katba haduh ba un da jem syndon jai, ka poi sha ka ar minit tam eiei.
La ioh khubor, ba kiba bun ki briew, kiba don ha ki iing ki sem, ha ki hospital, ki la ia mih kyrkieh shabar, namar ka jingtieng ioh ba kin shah ban ha ka jing or pait jong ka iing.
Wat la ki don ki jingjulor ba malu mala, hynrei la sngewthuh ba kam don kano kano ka jingjia kaba jur ha ka nongbah Shillong, lane ha kiwei pat ki bynta jong ka jingkhie Jumai.
Katei ka jingkhie jumai, ka jia ruh ha ka sor bah Guwahati, ha Kolkata, ha ki bynta jong ka Bihar bad wat shaduh Delhi ruh.
La iathuh da ka National Centre of Seismology (NCS), ba ka jingjylliew jong utei u jumai, ka long 134 Kilometre bad ka tnat peit jumai jong ka America, ka iathuh ba utei u jumai u khlain bor haduh 7.0 bad katei ka la pyn khynniuh ia ka Myanmar bad ki bynta ba sha mihngi jong ka India. La iathuh ba u jumai u khie ruh ha Nepal, ha Bangladesh.
U nongthoh khubor na Jowai, u iathuh ba ka iing dorbar jong ka Caroline Colony, Ladthadlaboh Jowai ka la shah pynjot ha u jumai uba la khie mynta ka janmiet. Nalor kane ka iing dorbar ki dang bun ki iing shong briew khamtam ki iing sorkar kiba kynthup ia kawei ka jaka sah u nonghikai ka Kiang nangbah Government College, ka ophis bad ka jaka sah jong ka PWD nalor kiwei kiwei.
Phi don ban ong eiei?