Shillong, 13 Iaiong:
Ka jingialang ka kynhun myntri ka kabinet mynta ka sngi ka la pdiang ban pynkylla ia ka ain bat kam ki Parliamentary secretaries ka Meghalaya Parliamentary Secretaries (Appointment, Salaries, Allowances and Miscellaneous Provisions) Amendment Ordinance.
“Ngi la rai ban pynduh noh ia ka Section 5 bad pynkylla ia ka Section 6 bad 6A jong kane ka ain”, la ong u myntri ka Parliamentary Affairs Bah Prestone Tynsong hadien ba la wai ka jing ialang mynta ka janmiet.
Ha kajuh ka por, u Myntri Rangbah u Dr Mukul Sangma u la ong ha ka jingshisha, ka jing risain jong u Parliamentary Secretary Bah Lambok lang Mylliemngap kam donkam.
U Bah Lamboklang Mylliem u la risain dang shen kum u Parliamentary secretary namar ba sheptieng ioh khyrwait ha kane ka ain mait kyrteng.
Ka High Court kham mynshwa ha kiba bun ki jylla ka ri, ki la pynsangeh ia ka jingthung parliamentary secretaries ki sorkar jylla namar ba kam iahap bad ka ain.
U Bah Lamboklang uba dei u MLA marwei na ka seng North East Social Democratic Party (NESDP) ha ka iing dorbar thawain, u la shah jied na Jirang constituency kaba hap ha Ri Bhoi.
Ha kane ka sorkar MUA-II, ki don haduh 18 ngut ki parliamentary secretaries ba la thung ha u snem 2013 hadien ka elekshon.
Mynshem taiew, na ka liang ka HSPDP ka la dep ujor sha u Lat ka jylla halor ka jingthung PS kane ka sorkar kaba long pyrshah ia ka ain bad ka pyrshah ban pynkylla ia ka Meghalaya Parliamentary Secretaries (Appointment, Salaries, Allowances and Miscellaneous Provisions) Act, 2005. Ka HSPDP ka la kyntu ia u Lat ban tuklar ia kane ka kam.
Ka HSPDP ka la dep ai jingthoh sha u Lat ka jylla da kaba kyntu ia u ban khang lad ia ka sorkar jylla ban pynkylla ia kane ka ain tang ban ai jaka shong ia ki Parliamentary Secretaries kaba long tang ka jinglut phut ia ka pisa paidbah.
“Ka sorkar MUA-II ka thmu ban pynkylla ia kane ka ain, hynrei na ka liang ka seng kam iahap satia bad ym don jaka ia ka sorkar ba kan leh ia kane”, la ong ka HSPDP ha ka shithi sha u Lat.
Ka HSPDP ka la ong ba ka jingpynkylla ia ka Meghalaya Parliamentary Secretaries (Appointment, Salaries, Allowances and Miscellaneous Provisions) Act, 2005 kan long pyrshah ia ka kyndon ka riti synshar ka ri ka 91st Amendment.
Phi don ban ong eiei?