Shillong, 11 Naitung:
Wat la ki iabein, hynrei ha ka politik kam don jingkhang. Katkum ka jingiakren bad u MLA ka UDP, ka Congress haduh mynta ka la iai khroh ia ka UDP ba kan wan ban ia thaw sorkar lang wat ha kane ka kynti ruh.
Haba iakren mynta ka sngi Thohdieng bad u MLA ka UDP na Nong thymmai u Dr Jemino Mawthoh, u la kubur ba ka long ka jingshisha ba ka Congress ka la iai khroh ia ka UDP ban wan ban thaw sorkar ha kane ka kynti khnang ban ioh ia ka sorkar kaba skhem. Kane ka jingkhroh ka Congress ka long kham tam hadien ba ka sorkar ba don ha Delhi la synshar da ka BJP bad ka don ruh ka jingiakhih hapoh ka party ban bujli myntri rangbah ha jaka jong u Dr Mukul Sangma. “Hynrei ngim dei kiba biej ia ka shuki ne ia ka myntoi shimet, ngi kum ki nongialam ngi hap ban pyrkhat ia ka jingbit jingbiang ka jylla”, la ong u Dr Mawthoh.
U la ong ba ka Congress ka la wan ban khroh ia ka UDP mynta la katto katne por bad haduh mynta ruh. “La bunsien mynta ki wan khot ia ngi ban iadon lang ha ka sorkar hynrei na ka liang ka UDP, kam shym la pdiang ia kane namar ba ka hap ban sngap ia ka sur jong u paidbah babun balang ka jylla”, u la ong.
“Haba ngi leh ia kano kano, ngi hap ban pyrkhat bunsien ym ban shu kmen ne ban leh hak dak”, la ong biang u MLA ka Nongthymmai.
U la ong ba ka UDP kum ka liangpyrshah kaba heh, kan trei ia ka kam kumba la bynshet u paidbah.
“Ngi hap ban jynsur mynsiem, lada ngi long khim jingmut, wat ka ARPA ruh ha KHADC kam nym neh”, la ong u Dr Mawthoh.
Ka UDP ka 8 ngut ki MLA ha iing dorbar thawain ka jylla, katba ka Congress ka don 29 ngut bad lada kin iashong lang ban thaw sorkar, ka long 37 ngut.
Kumba long mynta, ka Congress ka la bunkam namar ka jingdon ki MLA shimet kiba kyrshan ia ka sorkar ha kaba kin hap ban pynhun ia ki. Ha ka por ba la dep, ka UDP ka iathaw sorkar lang bad ka Congress bad ha ka elekshon ba la dep, ka Congress ka la kiew ha ka jingjop katba ka UDP ka la hiar.
Phi don ban ong eiei?