Shillong, 17 Naitung:
U MLA ka Nong thymmai u Dr Jemino Mawthoh u la ong ba bun ki briew nabar jylla ki phah pule ia ki khun jongki sha Shillong hynrei ki briew na kane ka jylla pat ki phah sha kiwei ki jaka.
Haba kren ha ka jingialang pynkup burom ia ki samla ba pas ha ki eksam ba la pynlong da ka Seng Samla Dong Ktieh mynta ka sngi Palei, u Dr Mawthoh u la ong ba ka nongbah Shillong ka dei ka jaka pdeng ka jingpule jong ka thain shatei lam mihngi ka India.
U la ong ba ki briew kane ka nongbah ki long kiba donbok ban ioh ia ka jaka pule kiba biang ba la wanrah da ki phareng mynshwa bad kim dei ban pynlehnoh ei ia kane ka kabu.
U la ong ba u la sngewlyngngoh ban tip ba kawei ka longing na Chennai ki la iathuh ia u ba kip hah skul ia ki khun ha Shillong.
U Dr Mawthoh u la ong ba ki samla pule ki dei ban pyndonkam bha ia kane ka lad na ka bynta ka jingmyntoi jong ki. “Ka jingnang jingstad kan pynlong ia u briew uba bha bad kan wanrah ia ka lawei kaba myntoi”, la ong u Dr. Mawthoh. U la iaroh ia ki samla pule ka Meghalaya kiba pule shabar ruh kiba la leh bha. Ia ki jingeh lah ban jop da ka jingtrei shitom bad bynrap ba ka jingnang jingstad kam dei tang ban long ka jingpas ia ki kyrdan hynrei kan long ruh ka spah ia ka imlang sahlang.
U la ong ruh ba ha ka snem 2020, ka India kan long ka ri kaba samla tam ha ka pyrthei bad ha u snem 2022, yn don ki kam haduh 50 million ban trei da ki samla bad ki samla pule kane ka jylla ki dei ban pyndonkam bha na ka bynta kane ka kabu kaban sa wan.
Katba u Bah R.S. Syiem u la pynshlur ia ki samla ban trei shitom khnang ba kin ioh ia u soh ka jingjop ha ka jingpule jongki.
Ha kane ka jingialang, san ngut ki samla ba pas bha ha ka HSSLC bad hynniew ngut kiba pas ha ka SSLC ki la shah pynkup burom ha ka Seng Samla Dongktieh Nongrah. Ka jingialang ka la pynlong ruh ia ka jingsngap kaba ar minit ban kynmaw burom ia u Syiem U Tirot Sing.
Phi don ban ong eiei?