Shillong,17 Naitung:
Mynta ka sngi baroh kawei ka jylla ka la ioh ban rakhe ia ka lyngkhuh sngi iap ba 179 u Tirot Sing Syiem, bad la kynmaw burom bad buh syntiew ha u mot utei u Khla Wait ka Ri , uba la iakhun pyrshah ia ka sorkar phareng ha kylleng ki jaka ka Ri-Lum Khasi.
Ki la don bun ki seng bhalang, ba kynthup ia ka KSU bad kiwei pat ki seng kiba la rakhe ia katei ka lyngkhuh sngi iap ba 179 u Tirot Sing, nalor ki sengbha lang ki seng sain pyrthei ruh kumjuh ki la kynmaw burom ia katei ka sngi, ki seng sain pyrthei ba kynthup ia ka UDP, ka KHNAM bad ka BJP ki la rakhe kynmaw burom ia ka lyngkhuh sngi iap u Tirot Sing.
Mynta ka step ka KSU ka la rakhe ia katei ka sngi ha U Tirot Sing Indoor stadium, bad ha katei ka jingialang la wan ban leh kynmaw burom ia u Tirot Sing da u President ka KSU u samla Daniel Khyriem, bad kumjuh ruh u President barim ka KSU u samla Samuel Jyrwa. Ha katei ka ijngialang la pynlong ka jingsngap jar kaba ar minit da ki dkhot jong ka KSU kum ka dak ka jingkynmaw burom ia utei u khla wait ka Ri.
La leh burom ruh ia katei ka sngi ha Hima Nongkhlaw kaba dei ka Hima ba u Tirot Sing Syiem u synshar, ha ka juh katei ka sngi ka sengbhalang kaba dang shu thaw thymmai ka Hynniewtrep Youth Council (HYC) ka la rakhe kynmaw burom ia katei ka sngi ha kaba ka la leit ban buh syntiew ha u mot u Tirot Sing ha State Central Library.
Ha shnong Nongkhlaw ruh la pynlong ia ka jingialang kaba heh ban kynmaw burorm ia katei ka sngi ha kaba u bah John F Kharshiing u Chairman ki Khlieh Nongsynshar u la ia donlang, la donlang ruh u bah Brol Nongsiej, MLA Mawthadraishan, u bah P.K Pangniang, MLA Rambrai-Jyrngam, u bah Kennedy Khyriem, MLA Mawphlang bad u Syiem ka Hima Nongkhlaw.
Phi don ban ong eiei?