Shillong,13 Lber:
Ka Nationalist People’s Party (NPP) ka la kynnoh ba ka sorkar Congress hapoh ka jing ialam u Dr.Mukul Sangma kum u myntri rangbah ka jylla ka la pynkheiñ ia ki kyndon bad ki Aiñ ka District Council da kaba phah da kawei pat ka kyrteng sha u Lat ka jylla ban long kum ka MDC shu sieh. Ka NPP kaba bat ia ka bor synshar hapoh GHADC ryngkat kiwei pat ki kynhun jong ka, ka la dep ban phah ia ka kyrteng u Conrad Sangma (u khun jong u Purno A Sangma) ban long kum u MDC shu sieh hynrei ka sorkar jylla ha ka jingialang ka kyn hun myntri jong ka ha ka sngi thohdieng jong ka taiew ka la mynjur ban phah sha u Lat da ka kyrteng ka Selma D Shira kum ka MDC shu sieh.
Ka NPP ka la kynnoh ba katei ka jingleh ka sorkar ka dei ka jingiaid lait ia ka riti synshar ka ri India. Ha ka jingialang jong ka kaba la long ha ka sngi saitjaiñ jong ka taiew ka NPP ka la pynrem jur ia katei ka jingleh ka sorkar jylla. Katei ka seng ka la shim ruh ia ka rai ban leit ia kynduh markhmat bad u Lat ka jylla ban ia kren ia katei ka phang.
“Kane ka dei ka jingpynkheiñ ia ka Rules 6(1) jong ka Assam and Meghalaya Autonomous District (Constitution of District Councils) Rules 1951” ong ka kyrwoh khubor na ka seng NPP. Ka la pynbna ruh ba kan pynlong da ka jingiasoi paidbah ha ri Lum Garo bad kan pynlong da ka jingiashong kyraiñ ha ka lah sngi u blei hakhmat ophis ka GHADC ban pyrshah ia katei ka jingleh ka sorkar.
Haba kren halor katei ka phang u CEM ka GHADC u Augustine Marak u la ong ba ia ka kyrteng u Conrad la dep ban phah naduh u naiwieng jong u snemba la dep hynrei haduh mynta ruh ympat shym la ioh jingmynjur ia ka kyrteng jong u, “Ka bui ka la shu sah ha ka miej u Myntri Rangbah haduh mynta ruh, ngi laphah bun ki jingpynkynmaw hynrei haduh mynta ruh ngim pat ioh jubab eiei, ngi kyndit mynta ba ki la phah pynban da kawei pat ka kyrteng” kren bitar u Augustine Marak. U Marak u la ong ba ka rai ki paidbah Garo kam dei ia ka seng Congress ha District Councilbad dei ban burom ia katei ka rai ki paidbah.
“Ka sorkar kam don hok ban pynduh ia ka hok kipaidbah ka Garo ba kin ioh ia kaei kaba ki la jied,kam dei tang ba sh upynremtang ka ktien hynrei ka dei ruh ka por kaba jngan bha” ong u Augustine uba la pynkynmaw ruh ba ka sorkar kam shym la burom ia ka jingkhlad ba kyndit u Purno A Sangma ha kine ki khyndiat sngi.
Phi don ban ong eiei?