Shillong,14 Nailur:
Ka jingbym ioh lad ban pynpaw bad pyn sngew paidbah ia ki jingeh ba ki ju ia kynduh ha khmat ki MDC ka KHADC kiba la hiar dang shen ha Block II, ka la pyndiaw myn siem ia ki paidbah katei ka thain namarba ki la ang nud shisha ban pynsngew hakhmat baroh ki MDC ha katei ka sngi ba kyr pang ia baroh ki jingeh jong ki, hynrei katei ka jingangnud jong ki, ka la pulom noh namar ba ym shym la ailad ia ki ban kren tang shi kyntien ruh.
Kham hadien haba kren sha ki nongthoh khubor, balei ba ka KHADC kam ailad ban kren paidbah, u CEM bah Ardent M Basaiawmoit, u pynshai ba ka daw ka dei namar ba ki donlang ki pulit Assam kiba la wan peit siar ia katei ka jingialang bad kiba wan ban ring dur Video ia ka jingialang, dei na kata ka daw ba um ailad ia ki paidbah ban kren ba kan ym ktah ia ka shongsuk shong shngain jong ki.
Haba kren sha ki nongthohkhubor halor katei ka jubab u bah Ardent, ki paidbah katei ka thain ki la kynthoh kylla pynban ha kaba kawei na ki longkmie ka kong Lucia Sten na ka shnong Umtlih ka la ong ba lada tieng ia u pulit Assam, te kan myntoi aiu ia u CEM un wan bad ka la ong ruh ba balei yn tieng namar ym dei ba mut ban kren sniew iano iano ruh hynrei tang ban ioh pynpaw ia ki jingeh ha ka liang ka roi ka par. Ka Kong Lucia Sten ka la iathuh bad pynkynmaw ba ha ka jingwan jurip jong ki heh ka KHADC kata naduh u CEM, ki EM bad ki MDC ka Liang Pyrshah ha ka 29 tarik Naitung, ki la khmih lynti shibun ban ioh pynpaw ia kine ki jingeh kaba ki mad ha ka liang ka jingsahdien hynrei kim shym la ioh lad satia.
Ka Kong Sten ka la ai jingiaroh ruh ia ka jingkren u Bah Teinwell Dkhar kaba la mih dang shen ha ki kot khubor ha kaba u la ong, ba ka jinghiar ki MDC ka KHADC kam shym la don jingmut satia namar ym shym la lah ban leh eiei bad ong ruh ba la mih na Council da ka jingmut ban leit ban tei hynrei ym shym la lah satia namar kam shym la don jingmut, haba ym shym la ailad satia ia ki paidbah ka thain Block II ba kin kren bad pynpaw ia la ki jong ki jingeh. “Dei halor kane ka nongrim ba kum ki paidbah na ka thain Block II, ba ngi sngew iahap ia ka lynti ba shim ka UDP namar kane hi ka pynpaw ba kum u CEM u la kwah ban synshar donbor marwei khlem da kynjoh ktien lem,” la ong ka Kong Sten.
U Bah Jolly Shadap na ka shnong Umtlih u la ong, ka jingeh hi kaba hakhmat eh ba ka Block II ka mad, ka dei ka jingsniew ka surok, ki jaka ai jingsumar ki bym biang, ka iew ka hat. Ka surok na Umwang haduh Umtlih ka long kaba ktieh palat bad buh jingeh ha ka leit ka wan, ka jingbym don ki jaka ai jingsumar pat ka buh jingeh haba kem pang ne shitom.
U Bah Enel Makdoh Rangbah Shnong ka Umlaper u la ong, ka sorkar ka la ieh beiñ ia kane ka thain, ka roi ka par kam don satia, kaba ioh ruh ka long tang malu mala kata na baroh ar liang na ka Meghalaya bad Assam hynrei ym ju don satia ban wanrah ia ki skhim ba heh.
U Bah Makdoh u la ong, ka jingsuk kaba la wan phai sha ka thain na ki seng lehnoh ka long ba ki nongshong shnong mynta ki la sian bha ha ka pyrkhat pyrdain. U la ong ha kaba iadei pat bad ka roi ka par, ki jingkular kaba kum ki shnong ki ioh ka long tang ha ka por ilekshon hynrei ym ju urlong satia pat hadien.
Haba ia kren bad kitei ki riew paidbah na kitei ki ar shnong ki la pynpaw ia ka jingsngew iahap ka jong ki ia ka lynti kaba ka seng United Democratic Party (UDP) ka la shim, kata ban dawa bujli ia u nongialam ka All Regional Party Alliance (ARPA) hapoh ka Khasi Hills Autonomous District Council (KHADC). Kitei ki paidbah ki la pynpaw ia shibun ki jingeh ha ka roi ka par kaba ka thain ka shah ieh bein ha ka sorkar.
Phi don ban ong eiei?