Shillong,12 Nailar:
Bun kiba la ujor sha u nongthohkhubor ba ka la don ka jingshah bat ki kali kit shyiap, la kumba lai taiew eiei; tang mar ia poi ha Mylliem bad kitei ki kali kit shyiap kiba la shah bat ki dei kiba la wan na ki thaiñ Kynshi bad kiwei pat ki jaka. Kitei kim shym la tip na kano ka daw ba ki shah bat bad ki la iathuh ba la pynphai biang ia ka kali jong ki bad don ruh kiba la iathuh ba ia ki shyiap la hukum ba ki dei ban pynhap noh ha Mylliem.
Hadien ba la ioh, ia katei ka jingujor u Rupang mynta ka sngi u la ioh ban ia kynduh ia ki nongkitkam jong ka Synjuk Ki Nongtrei Shyiap, Mylliem East Khasi Hills kaba dei ka kynhun kaba la ithuh da ka sorkar. Haba ia kren bad u bah Andrew Khar-kongor u President katei ka Synjuk u la batai ba hadien ba ka sorkar ka la pynmih ia ka hukum ha ka 14 tarik u naitung ba ym shah shuh ban tih shyiap um lane tih shyiap lum ha East Khasi Hills, katei ka seng ruh ka la pyntreikam ia katei ka hukum da kaba khanglut ia baroh ki kam kit bad khaii shyiap, khnang ba kin ym don kiba ioh ban leh tuh leh thok ia katei ka kam.
Ula ong ba lada jia ba kiwei ki lah ban die tuh, kan ktah ia kiwei pat ki bym ioh lad ban leh ia katei ka kam. U la ong ba kumba ka long mynta ia ki shyiap napoh East Khasi Hills baroh kawei hi la ju tip kum ki shyiap Mylliem, namar ba katei ka Synjuk ka dei kaba kynthup lut naduh Smit bad kiwei pat ki jaka kiba hap hapoh EKH. U bah W.Khyriem Secretary katei ka synjuk u la ong ba katei ka jingleh ka Synjuk ka dei ym tang hapoh Mylliem hynrei ka long ha baroh ki jaka kiba ka Association ka la phah briew khnang ban pynthikna ba kin ym don ki nongdie tuh ia u shyiap. U la ong ruh ba katei ka jingleh jong ki, ka dei ban pynsngewthuh ia ki paidbah ba ym dei tang ki nongtrei shyiap kiba donkam ia katei ka kam, hynrei ka dei kaba ktah ia baroh kiba hap ban pyndonkam da u shyiap ha ka jingtreikam jong ki, “Hato dei tang ma ngi she mo kiba donkam?” ong u ba Khyriem haba ia kren bad u Rupang.
Haba la kylli na kitei ki nongialam ka Synjuk Ki Nongtrei Shyiap, hato haduh katno katei ka jingkhang shyiap ka ktah, ki la iathuh ba mynta ka la ktah lut ia baroh ki kam ki jam ki paidbah kaba haduh ba la hap ban sangeh shuwa ia ka kam NREGS ne ka kam shispah sngi tang na ka daw bym ioh shyiap bad kumjuh ruh kito ki nongbylla misteri. Haba la kylli pat haduh katno ngut kiba nongtrei shyiap kiba shah ktah namar katei ka hukum ka sorkar, u la ong ba ki la don kumba 5000 ngut kata tang ki nongtrei shyiap lait noh kiwei pat kiba la shah ktah kum ki dukan sha kiba la khanglut mynta.
La kylli biang kumba ka long mynshuwa kumba katno trok ha ka shisngi la ju phah shabar ia u shyiap Mylliem, u bah Andrew Kharkongor u la iathuh ba la u phah kumba 200 trok ha ka shisngi. La kylli biang sha kino ki jaka ba la ju phah bun eh ki shyiap, u la iathuh ba la ju phah sha Sohra, sha NEPA, sha NEHU, sha NEIGRHIMS bad kiwei pat ki jaka. Ki la iathuh ba na bynta katei ka kam ki la leit ban ia kynduh ia u Deputy Comissioner ka East Khasi Hills, U SP ka East Khasi Hills ban ia kren bad ka jingiakren jong ki haduh mynta ka dang iaid shakhmat. Haba la kylli biang hato ki la leit ne-em sha ka ing bishar ban ia khun mukotduma ia katei ka kam ,ki la jubab ba kim pat shym la leit hynrei ki shu leit tang ban kyrpad ia ki bor bahalor ban pyllait na katei ka jingeh.
Da katei ka buit ba ki nongtih shyiap ki leh mynta baroh ki kompeni, ki jaka tei ia ki jingtei sorkar lane shimet, ki la dik ka treikam treijam namar ka jingkyrduh shyiap naba katei ka Synjuk kam shym la pyllait tang shi kali u shyiap ba kan leit sha kano kano ka jaka ruh kat kaba dang hap hapoh East Khasi Hills naba ka la shim ba u shyiap uba na West Khasi Hills u dei ban sahkut beit tang hapoh West bad lada jia ba phah shapoh East Khasi Hills, yn bat beit ha ka jaka ba ki lap.
Phi don ban ong eiei?