Shillong, 13 Iaiong: Katba uwei na ki nongthoh khubor, u dang buh jingkylli, ia U Mukul Sangma, la un pynthym mai biang ne em ia ka kynhun myntri jongu, hynrei ha katei ka por, ha shwa ba u myntri rangbah, un jubab, la khih u jumai ba jur, ha kaba la sngew, kumba ula pyn shad tawiar ia ka ophis Secreteriat.
Mar ia khie u jumai, u myntri u ieng noh joit, na ka jaka shong jongu, ha kaba la don ruh ka kong Roshan Warjri, myntri kam poh iing ka Jylla. Namar ba u jumai, ym shym la neh slem, kumta kitei ruh, ki la mih noh bak na ka Committee Room bad ka jingiakren bad ki nongthoh khubor ruh, ka kut noh tang katta hi.
Ha kane ka por, baroh kiba don ha kamra ha Secretariat ki la kyndit namar ba u jumai u la wan ban pynkhih kham jur haduh ar sien. Kane ka la jia ha ka por ba ka jing iakylli jing iakren hapdeng ki nongthoh khubor bad u myntri rangbah ka dang iaid, khamtam kaba iadei bad ka jingbujli ia ki kam ki myntri sorkar.
Une u jumai uba la khlain bor haduh 6.8 Richter scale u la wan na ka phang khappud ka Myanmar bad India.
Ka iing Secretariat ka la padoi ha kane ka por, haduh ba la pynrit mynsiem ia kiba bun. Don ki ophisar bad ki myntri sorkar kiba la ieng noh bak mar na jaka shong ha ka por ba khie u jumai namar ka jingtieng.
Haba ioh sngew kynsan ia une u jumai, u Myntri Rangbah u la ong “Ki jingtei jrong dei ban sangeh mardor”, la mih ka sur na u Myntri Rangbah ha kane ka por.
Phi don ban ong eiei?