Shillong, 09 Naitung:
U MDC ka Mawlai Constitunecy Bah Process T Sawkmie, ula leit jngoh hynne ka step ia ka jaka ot doh jong ka tnad Animal Husbandry & Veterinary ka Sorkar Jylla, kaba don ha Mawlai Mawiong.
Ia u Bah Process la synran lang da u Asst Director ka Tnad Dr KB Sahkhar, u Engineer ka Tnad, u Contarctor lem bad ki Rangbah, ki Longkmie bad ki Samla jong ka shnong Mawlai.
U Bah Process ula pynpaw ia ka jingsngewkmen halor ka jingwan jong ka Project ha Mawlai bad u la kyntu ia ka Tnad ka dei ban shimkhia bha ha kaban khmih ba ki jaboh kiba mih na ka jingshah doh, kim dei satia ban tuid sha ka Wah Umshing, kaba dei ka tyllong umbam umdih jong ka shnong Mawiong.
U Dr Sahkhar ula pyntip ka tnad kala kitkhia bha ia kane bad ka pynthikna ba baroh ki jaboh ba tylli ne ka um, na kane ka jaka shohdoh kin neh beit hapoh bad yn nym don khyndiat ruh ban leit bret, theh ne pyntuid shabar.
“Ia ka jaboh um, ngi la shna ia ki pung ban pyntuid ia ki jaboh ba kynthup ia ki pung ban pynkhuid ia ki jakhlia bad ka pung ban pyllang ia ka um bala dep pynkhuid, kaba ngi lah ban pyndonkam ban siat ban khlieng bad ban ri Dohkha ruh” ong u Dr Sakhar.
U Dr Sakhar u pyntip ba ka project ka kynthup ruh ia ka Treatment Plant ban pyn iakhlad ia ka jaboh um bad ba tylli bad ia kane ka jaboh tylli, yn sa pynkhuid bad tylliat ia ka da ki kor machine ba kan long sboh rep jingrep.
U Dr Sahkhar u pyntip ruh ba na ka liang ka Tnad kala dep iasyllok bad ki Seng jong ki Nong shoh doh bapher bapher ka Jylla bad kala tyrwa ia ki ba kin ai ka jingiatrei lang ha ka ban pyndonkam ia kane ka jaka shohdoh ka sorkar na ka bynta ban lah pynmih ia ka doh kaba khuid ka ban die sha u paidbah bad kumjuh ruh ban lah tehlakam noh ia ka jingpynjakhlia ia ka mei mariang.
Phi don ban ong eiei?