Shillong, 14 Nailur:
U MP ka BJP ha Rajya Sabha u Dr Chan dan Mitra la ai jingmut ia ki jylla kane ka thain shatei mihngi ka India ban shim ia ki lad ki lynti ban ban khanglad na ka jing wan rung ki mynder khamtam na ri Bangladesh. Haba kren ha ka jingrakhe dap ka Dr Rad hakrishna Boy’s Secondary School sha ka 50 snem ha ka sngi Saitjain ha nongbah Shillong, u Dr Mitra u la ong watla ym ioh ia ka jingkhein kaba bniah ia ka jingdon jong ki Bangladesh ha ka ri India, hynrei la shu khein kyllum ba ki Bangladesh kiba sah ha India ki la palat ia ka 4 klur ngut bad kane ka pynpaw ia ka jingbym shim khia bad bym don ki ain bapyrkhing.
Katkum ka jingong u heh ka BJP, ka daw kaba pynioh lad ia ki briew na Bangladesh ban sah ha India, dei namar ka jingiarap jong ki seng sain pyrthei bad ki politishian ban shna vote ha ka por elekshon.
“Nga tip ba ka suk ban rung na khappud hynrei mynta ka por ka la dei ban khang lad noh shi syndon ban dang wan rung sha kane ka ri. Dei ruh ban khang lad ia kito kiba wan rung sha kane ka ri ban ioh bylla bad wat kito kiba la don hangne ruh kim dei ban ioh ia ka hok long trai”, la ong u Dr Mitra.
U Dr Mitra u la ong ruh ba ha kane ka thain shatei lam mihngi ka ri India ka jingeh na ka kam mynder ri ka iapher bad kiwei kiwei ki bynta jongka ri. U la ong ba ka India kam dei ka jaka rieh tngen ia ki mynder ban wan rung bad sah katba mon. U la ong dei ban don ki ain ban kem ia ki mynder bad pynphai ia ki sha kito ki jaka ba ki wan bad dei ban weng noh ia ki kyrteng jong ki na ka electoral roll.
Kiwei kiwei kiba la kren ha katei ka jingiamir jingmut ki long u Dr Jemino Mawthoh MLA jongka Nongthymmai, U Myntri ka tnad pule puthi ba mynshwa u Manas Choudhuri, Dr N.G Mahanta bad nongiasaid ain Hafeez Rachid Choudhury.
Phi don ban ong eiei?