Shillong, 15 Rymphang: Ka dei ka shnong kaba don hapoh sor Shillong hynrei isangsot ba ka shnong Madan-rting kam da ia pher than na kiwei pat ki shnong nongkyndong haba phai sha ka roi ka par bad ka bit ka biang u paidbah. Haba peit na surok bah i kumba katei ka shnong ka la bit la biang bah hynrei tang mar ia rung hapoh shnong u nongthohkhubor u la lap ba katei ka shnong kam don tang ki nala um kiba biang ruh.
La iohi ba haba rung hapoh katei ka shnong ia ka surok i kumba ka dei ka nala um naba ka surok bad ka nala ka ia ryngkat bad ki rud surok ki la shah bam ha ka um, ki briew kiba sah ha katei ka thaiñ ki la iathuh ba la don bun kiba mynsaw na ka daw ka nala; don kiba ur ba hap hapoh nalabad don ki nongniah ar shaka kiba liat ha ki nala kiba ia ryngkat bad ka surok bad kiba kum kita ki jingjia.
Katto katne bynta na ki nala kiba don harud surok shnong la i ba ki jlih bad la don ba maramot hynrei haba la wad jingtip la lap ba ka dei kaba la maramot hi da ka bor shnong da ka jingnoh synniang jong ki nongshong shnong. Ia katei ka jingjlih ka nala la lap ha Madanrting Pdeng Shnong kaba ki ong ka block D. Haba ia kynduh ia ki bor shnong ki la iathuh ba ia katei ka nala la pynbha hi da ka shnong lyngba ka jingnoh synniang jong ki nongshong shnong bad ka jinglut baroh ban pynbha ia katei ka nala ka long T.69 hajar tyngka kata ruh lait noh ka bai sngi kaba lawan ban trei sngewbha da ki briew jong ka shnong,bad ka bynta kaba la dep pynbha ka don kumba 150 mitar eiei.
Katkum ka jingiathuh ki bor shnong ki la ong ba katei ka jingpynbha ka shnong ka dei tang shi troh haba ia nujor bad kiwei pat ki nala kiba dang sah ban dang pynbha kiba don hapoh shnong,hynrei ki la ong ba ki bor shnong kim kot bor shuh ban dang iai pynbha ia ki. Haba la kylli balei kim shym leit wad jingiarap na ki bor sorkar ne na ki nongmihkhmat jong ki ban pynbha ia katei ka nala hynrei ki la jubab ba kila ngiah ka leit rung ophis sorkar kaba kila leit ban wad jingiarap la bun bunsien hynrei khlem poi shaei shaei ruh. Haba phai sha ki nongmihkhmat ki la ong ba la shu tang ka jingphah jingthoh hynrei ym iohi pat ia ka kam.
Haba u nongthohkhubor u hiar kham sharum jong ka Madanrting Block D la lap ba hangtei ka don ka surok khohruh khohram kaba bun ki nongniah kali bad ki nongshong shnong ki la khnium lut ia ka jinglong katei ka surok bad ki la ong ba katei ka jaka ba don ka surok khohrum khohram ka dei kaba ju khot kum ka Madanrting Them-basuk bad katei ka dei ka surok kaba pyniasoh ia ka madan rting bad ki shnong kum ka Jyntah –Umphyrnai bad ka dei ruh ka lynti ban leit sha jowai kaba ki kali ki ju iaid bha nangtei ha ka por ba jur ka jingdheng kali.
Ki bor shnong jong katei ka shnong ki la iathuh ba katei ka shnong ka dei hap hapoh ka Nongkrem Konstitwensi kaba u bah Ardent M Basaiawmoit u dei u MLA, katba ha ka MDC pat ka hap ha Nongthymmai konstitwensi u bah Latiplang Kharkongor. Ki la iathuh ba bunsien ki bor shnong ki la phah jingthoh sha u MLA bad u la wan peit ruh dalade hynrei ka shu kut beit tang ha ka jingiakren katba na ka liang u MDC pat ki la ong ba u la noh synniang katba don la ka bor hynrei ki la ong “Ngi tip ba u MDC u dei uba dang rit ka bor , ngim khmih lynti than na u haduh katta katta hynrei u la noh synniang hi”.
Phi don ban ong eiei?