Shillong, 14 Nailar:
Lem bad ka ri baroh kawei, ka jylla Meghalaya kan rakhe ia ka jingioh laitluid ba 70 snem ka ri na kti jong ka ri Bilat lashai ka sngi, ka 15 tarik Nailar.
U Myntri Rangbah ka jylla u Dr Mukul Sangma un pynher lama ha ka nongbah lashai ka sngi katba kiwei ki heh sorkar kin pynher ha ki jaka kylleng jong ka jylla.
Na ka liang u Myntri Rangbah ha ka jingiakren dang shen, u la ong ba la bthah ia baroh ki tnad sorkar bad ka tnad pulit ba kan pynthikna ba ym nym don kano kano ka jingktah ban pynthut ia ki paidbah ban wan iashim bynta ha kane ka sngi rakhe laitluid.
“Ngin rakhe ia ka sngi laitluid ha ka rukom kaba shongkun ban ai burom sha ki riew lenlade ka ri”, la ong u Dr Mukul.
U la ong ba la bthah ba ka jingrakhe ia ka sngi laitluid kan long ha baroh kawei ka jylla naduh ki district, Block ruh bad ka sorkar ka la mang pisa ban pyndonkam ia kane na ka Chief Minister’s Youth Scheme.
U la kyntu ia baroh ki nongshong shnong ka jylla ban mih shakhmat ban iashim bynta ha kane ka sngi ba khraw ka ri.
Ka sorkar ka la buh pali ia ki heh sorkar ban pynher lama kynthup ia u Lamphang ka iing dorbar u AT Mondal ha Nongstoin, u Bah DD Lapang ha Nongpoh, u Dr RC Laloo ha Jowai bad u Bah Rowel Lyngdoh ha Mawkyrwat nalor kiwei pat ki myntri bad parlieamentary secretaries sha ki jaka bapher bapher ha ka jylla.
Phi don ban ong eiei?