Tura, 14 Nailar:
U Myntri Rangbah ka jylla u Dr. Mukul Sangma u la iakynduh bad iakren bad ki dkhot pyndem wait ka GNLA ha 2nd MLP Bn Rehabilitation Camp ba don ha Goeragre,hajan Tura ha kane ka sngi u Blei shwa ban wan ka sngi Laitluid.
U Myntri Rangbah uba wan phai artad sha Shillong ban iadon bynta ha ka jingrakhe sngi Laitluid, u la ia khublei kti iakren bad ki dkhot ka GNLA kiba don 49 ngut baroh ha katei ka jaka. Ka jingleit jngoh jongu, ka long ruh ban bishar iaka jinglong jingman bad ka jingai jinghikai ia kine ki dkhot ha katei ka jaka ba la buh ia ki.
Ia u Myntri Rangbah la synran lang u Deputy Commissioner u Pravin Bakshi, u DIG (Western Range) Bah S.S. Kynjing bad ki nongialam Balang ba dei ruh u ksiang ban wanrah ia kine ki dkhot sha ka jingim thymmai ia ki u Pastor F.D.Sangma bad u Commandant 2nd MLP Bn u C.B.S Reddy.
Kine ki dkhot ka GNLA ki dei ba wan pyndem wait noh ha u bnai Jymmang ha 2nd MLP Bn Goeragre, bad katto katne la buh ruh ha 4th MLP Bn Sophian, West Khasi Hills.
U Myntri Rangbah u la pynpaw ia ka jingsngew kmen ban iakynduh ia ki dkhot ka GNLA ba la pyndemwait markhmat bad ka jingwan phai jongki, kam dei ka jingkmen tang ia ka longiing longsem hynrei ki paidbah ka Garo Hills. U la kyntu ia ki ban shim kabu ban thaw thymmai ia ka jingim jongki da kaba pyntreikam ia ki skhim ba ka sorkar ka la ai ia ki, ym ban shu kwah ban ioh noh.
U la bthah ia ki heh sorkar ban hikai ia ki ban long ki nongtreikam lajong ban noh synniang ia ka imlang sahlang bad ban ialam ruh ia ki ban leit shabar kum sha Dawki, Mawlynnong, bad sha kiwei ki jaka ba kin iohi bad tip ia ki shnng bad ki briew ba ki treikam.
U Commandant ka 2nd MLP Bn u C.B.S.Reddy bad u DSP R.G.Momin ruh ki ai jingkren ha kane ka por.
Phi don ban ong eiei?