Jowai, 14 Nailar:
Ka Sein Raij Ialong, kawei na ki Sein Raij ha ri lum Jaintia kala rakhe ia ka lehniam bad la pynkut noh ia kane ka lehniam ba shisien shisnem mynta ka sngi hapdeng ka jing-iphuh iphieng bad ka jingshongshit.
Ki khon ka Sein Raij Ialong na ki dong bapher bapher ka shnong Ialong kibabkynthup iaka Ialong Khliehshnong, Khliehphyrngap, Mulang, Luti-tuber, Shnong-thymme, Kur Pale bad Ka Sein Raij Wahiajer bad ruh na Ka Shnong Nongkhyllep kila wan rah ia ki ‘Rong’ ba la shna itynnad sha ka pung kyntang kaba la tip kum ka ‘Pyrda’ kaba don ha Ialong.
Ha kane ka sngi nalor ki spah ngut ki paidbah na kylleng kiba la wan ban sakhi ia kane la lehniam, U ma Sniawbhalang Dhar uba dei u myntri badei peit ia ka tnad PWD, u ma Ngaitlang Dhar u MLA ka Umroi, u local MDC u ma Chemhok Garod, U MDC ka Jowai North Marki Mulieh bad kiwei kiweinkibhehbsorkar kiba kynthup ia u SP ka WJH, U R Muthu bad u Chief Engineer ka Water Resources Department, u ma KD Phawa nalor kiwei kiwei.
Ladon ruh ki nongialam ki Seinraij bapher bapher ha ryngkat u Acting Dolloi Jowai.
Ki la don haduh 9 tylli ki Rot kiba la wanrah na ki dong bapher bapher ka shnong Ialong bad ruh na shnong Wahiajer sha katei ka jaka na ka bynta ban bret khadduh ia ki bad ban pynkut noh ia ka lehniam mynta u snem.
Ia ka lehniam Behdeinkhlam ha ka Raij Ialong la sdang ia ka Khrong ka Khri- ha kaba ki thliew iing ha man la ki kyntoit bad ki dong bad ha ki shnong ki la iashim bynta ha kane da kaba synniang. Kito longing longsem kiba lait na ka sang ka ma, ki ioh ia kane ka Khrong ka Khri katba kito kiba don ka jingthoh bria ha ka imlang ka sahlang khamtam ha ki kam sang ki duh ia kane ka Khrong ka khri bad kin don bynta satia ha ka niam ka rukom. Ia kane ka Khrong la leh shi taiew sha ban sdang la lehkmen ka kynoi ka risa.
Mynta ka sngi ki lehniam ba kham kyrpang ki kynthup iaka Choh Thyndai iing bad ka Knia Khlam ban beh iaka pang ka shitom bad ia ka sih ka roi na ki shnong ki thaw bad ban kyrpad ia u nongbuh nongthaw ban kyrkhu kyrdoh ban bha ka rep ka riang.
Ia ki lehniam bapher bapher la leh da u ‘Langdoh’ ha ryngkat ki wasan, ki Maji bad u Sangot.
Ka Knia Khlam bad ka Wahbhang kidei ki lehniam ba khadduh ba la leh mynta ka sngi hadien ba la dep ban bret lut ia ki Rot kiba la wanrah sha Pyrda
Phi don ban ong eiei?