Shillong, 8 Naitung: Mynta ka sngi ki MDC ka KHADC ki la pynlong ia ka jingialang ba kyrpang na ka bynta ban pyrkhat ia ka shongsuk shongshngain ki paidbah kiba shong ba sah ha khap pud ka Meghalaya bad As sam khamtam kito kiba shong ba sah ha ki thain ba hap hapoh ka block II, kiba bunsien ki la ju shah pyndik ha ki briew ka Assam bad kumjuh ruh ha ki pulit Assam.
Ha katei ka jingialang la wan da ki MDC ka liang synshar bad kumjuh ruh ki MDC ka liang pyrshah, ha katei ka jingialang kam shym la don kano kano ka jingiakren na ka bynta ka kam pud kam sam hynrei ka jingiakren ka long beit kumno ban ai jingiada ia ki trai muluk kiba shong ha kitei ki jaka khnang ba kin lait na ka jingshah pynthut kumba ju long ha ki sngi ba la dep. Katei ka jingialang ka la shim ia ka rai ban thoh sha ka sorkar ha kaba ia dei bad ki lad ban ai jingshngain ia ki trai muluk ba shsong ha khappud bad shen hadien ba la ia dep buh sngi ban ia kynduh , baroh 29 ngut ki MDC ka KHADC kin leit ban ia kynduh ia ki bor sorkar ban ia kren halor katei ka phang. Katei ka jingialang ka la shim ruh ia ka rai ba ka KHADC kan hiar sha kitei ki jaka kiba don khappud ka Assam bad ban leit jurip kham bniah ia ka jinglong jingman ki briew ha kito ki thain, ka la pynkhreh ruh ban dawa na ka sorkar ba ka dei ban pynbiang ia ki Police Out Post khamtam ha kito ki jaka ba jur bha ka jingiakynad. Ka jingialang ka la rai ruh ba lada ka sorkar jylla kan ym sngap bad kan ym leh eiei ia ka jingdawa jong ki, ka KHADC kan leit ban ia kynduh ia u Lat ka jylla ban pynsngew ha u ia katei ka kam , kaba ka KHADC ka lah ruh ban leit ia kynduh ia ka tnad pohing ka sorkar pdeng ban ia kren halor katei ka mat.
Phi don ban ong eiei?