New Delhi,
10 Naitung:
U myntri pla pisa jong ka sorkar India, ula mang T.1,000klur, na ka bynta ban shna lynti rel sha ka dong shatei lam mihngi. Ia katei la kren, da u myntri ha Lok Sabbha mynta ka sngi, haba wan rah ia ka mang pisa jong ka sorkar India, ha kaba ula pyni ruh ia ka bhah, kaba dei na bynta ka dong shatei lam mihngi.
Ha ka sngi hat majai, u myntri kam rel jong ka sorkar India, U D V Sada nanda Gowda, ula mang T.5,116 klur, na bynta ki projek bapher ha ka dong shatei lam mihngi bad ki don 23tylli ki projek, kiba dang pynkhreh ban pyn treikam sha ka dong shatei lam mihngi, ha kaba 11tylli, na kitei ki dei ki projek jong ka sorkar India. U myntri pla pisa jong ka sorkar India, U Arun Jaitley, ha ka jingkren ba nyngkong eh jongu, kum u myntri pla pisa jong ka sorkar India, um shym la pynmih ia kano iano ka khajna, kaba ktah ia u riew paidbah, lait noh, tang kaba pynkiewdor ia u sikret bad kiwei de ki jingduh duma, ha kaba la nang pynkiewdor ha kane ka mang pisa kaba mynta.
Ki tiar ki ban kham tad, na ka mang pisa thymmai jong ka sorkar India bad kitei ki long ka television, LED/LCD TV kiba hapoh 19 inshi, ki juti kin shongdor T.500 haduh T.1,000 shijur, ki sabon, ki Desktop, laptops bad tablets, ki tiar pynkhuid um, ka petrol nalor kiwei.
Ki ban nang kiew dor, kin long u sikret, u pan masala, u jarda, ki tiar electronic ba thied na shabar, ki mawlynnai nalor kiwei pat.
Na ka jinglut, kaba la mang ha kane ka mang pisa kaba mynta, T. 98,030 klur, kan leit sha ka bha ka miat jong ki kynthei bad nangta sa T.81,075 klur, na bynta ka bha ka miat jong ki khynnah bad nangta sa T.53,706klur ia ka dong shatei lam mihngi.
La nang pynjynsur ruh ia kito kiba dei ban siew khajna, ha kaba kito kiba ioh kamai hapdeng T.2 lak haduh T.2.5lak, kin ioh na ka jingsiew khajna bad ia ki riew rangbah, la buh T.3 lak. Ka sorkar, ka la dep mang ruh T.4hajar klur, na ka bynta ban thaw ia ki iing ba duk, ha kaba ia katei ka pisa, yn ai sha ka National Housing Bank.
Ka sorkar India, ka la rai na ka bynta ban mang pisa kaba long T.14, 389klur, na bynta ka shim Pradhan Mantri Gram Sadak Yojana, kaba dei na ka bynta ban ai surok sha ki nongkyndong bad katei ka surok, ka long na ka bynta ban pynmyntoi sha ki jaka rep bad nangta la mang ruh sa T.3,600klur na ka bynta ban ai um bam um dih, kaba biang sha ki 20hajar tylli ki shnong ha ka Ri.
Phi don ban ong eiei?