Shillong, 13 Jylliew:
U MLA ka Ram brai uba la risain MDC na ka ain pyntieng kohtym pan ka sorkar ka ka Prevention of Disqualification (Members of the Legislative Assembly of Meghalaya) Act, 2015, u Bah K Plasting Pangniang u la ong ba ka rai jong u Lat ia ka jylla ban pynksan ia u Bah Pynshngain N Syiem ka pyni ba ka sorkar ka la thaw ain kulmar.
Ha ka jingiakren bad u Rupang, mynta ka sngi halor kumno u sngew ia ka jingpynksan ia u Lat ka jylla ia u Bah Pyn shngain halor ka jingbat ar kam kum u MLA/MDC, u Bah Pangniang uba long uwei na ki langknia ha kane ka ain, u la ong ba naduh ba sdang ba wanrah ia kane ka ain u la pyrshah satar hapoh ka iing dorbar thawain hynrei ka sorkar ba ialam ka Congress tang namar ba ka la biang ka jingbun paid ha iing dorbar, ka la shu pas jubor ia ka khlem da sngap ia ka jingpyni nia jong ki MLA liangpyrshah.
“Ngam babe ia ka jingrisain, namar ba ngam shym la risain hynrei dei ka sorkar kaba la leh jubor ia ngi”, la ong u Bah Pangniang u MDC ba la risain na ka HSPDP.
“Ka ain ka sorkar kaba la pdiang jubor da ka liang ba bun paid, ka dei ka ain ba beain bad ka jingleh jubor”, la ong u Bah Pangniang bad bynrap, ba u la wanrah ia ka Amendment ia kane ka ain ha ka por ba wanrah ha iing dorbar thawain hynrei ka sorkar kam shym la sngap bad ka la leh jubor.
U la ther ia ka sorkar da kaba ong, ba dei tang ha kane ka sorkar ba ka la thaw ia ka ain kaba beain bad kaba pynkulmar pynban ia ki paidbah ha jaka ban wanrah da ki ain kiban pynbha ia u paidbah.
”Kane ka sorkar ka thaw ain ban pynkulmar ia ki paidbah, ym pat ju lap ia ki sorkar ba kum kane”, la bynrap u Bah Pangniang.
Halor kane ka kam, u Bah Pangniang u la ong ba un wad un iasyllok shwa bad ki stad ki jhad ka ain bad ruh ia ki paidbah shwa ban shim ia ka rai kaei kaba dei ban leh.
Ha kajuh ka por, u Bah Pangniang u la ong ba kane ka sorkar MUA-II ka dei kaba leh khyllah namar ba ia ka elekshon ruh kam shym la lah ban pynlong wat hadien 6 bnai ba la palat ka jingiehnoh jong ki 6 ngut ki MDC. “Ngi dawa ba ka hok jong ki paidbah ban ioh ia ki skhim pynroi na ka MDC kam dei ban duh tang namar ka jingrisain jong ki MDC”, la ong u MLA ka Rambrai.
Ka ain khang bat ar kam ka Prevention of Disqualification (Members of the Legislative Assembly of Meghalaya) Act, 2015 ka sorkar jylla ka la kamkai kha-ma-kha hadien ba u Lat ka jylla u la pynksan ia u CEM ka KHADC u Bah Pynshngain N Syiem, ba ka ka district council kam hap ha kti ka sorkar.
Ha ka hukum ba la pynmih da u Lat ka jylla u V Shanmuganathan ha ka 31 tarik Jymmang, 2015, ka la ong ba katkum ka jubab ba la phah da ka Election Commission ha ka 16 tarik Jymmang, 2016, ka la pyni ia ki daw u Bah Pynshngain N Syiem uba dei u MLA um lah ban ong ba u bat ia ka ophis ba ioh jingmyntoi hapoh ka sorkar katkum ka Artikil191 (1) (a) jong ka Riti synshar ka ri bad u Bah Pynshngain N Syiem uba long u CEM um shym ngat satia ha ka kyndon mait kyrteng katkum ka artikil 191 (1) (a).
Hynniew ngut ki MDC ki la risain kynthup u Bah HDR Lyngdoh (Sohiong), Bah Ardent M Basaiawmoit (Nongkrem), Bah Metbah Lyngdoh (Mairang), Bah KP Pangiang (Rambrai), Bah Sanbor Shullai (Laban), Bah Brolding Nongsiej (Mawthad raishan) ka KHADC, bad u Stephanson Mukhim (Amlarem) ka JHADC hadien ba ka iing dorbar ka jylla ka la pdiang ia ka Prevention of Disqualification (Members of the Legislative Assembly of Meghalaya) Act, 2015 ka ain khang bat ar kam.Ka Iing dorbar ka la pdiang ia kane ka ain khang bat ar kam ha u bnai Nailur, 2015 bad ka la buh ba kan treikam noh naduh ka 1 tarik Risaw, 2015.
Ka UDP kaba la iakynduh lem ia kane ka apot ha kaba ar ngut ki MDC ki la risain, ka la ong ba kan sa shong jingialang ban iakren ia kane ka kam kumno ban iaid shakhmat. Ka sngew ba ka dei ka jingshah ialam bakla ha ka sorkar kaba shu pdiang jubor ia ka ain kaba khlem lerkam eiei.
Phi don ban ong eiei?