Shillong, 8 Naitung:
“Nga sngew kum ban pait ka khlieh haba nga pyrkhat kumno ngan bsa ia kine ki khun. Ki khun ki donkam pisa man ka sngi namar shibun ki jingdon kam. Ngan im sa tang shi taiew, ynda lah lut u khaw bad ka pisa ba lah pynlang, nga lah shu iap beit. Nga don khun san ngut, u lok u lah iap na ka jingdih buaid. Ngi lah sdang trei dewiong naduh u snem 1971, lada kane ka jingkhang ka dang slem, ngi lah shu iap thngan beit” ong ka kong Emika Syrti kaba sah ha Moopala, ka shnong kaba don ha East Jaintia, lai kilometer shuwa ban poi Sutnga.
I kong Deborah Pohtmi I ba lah don palat 60 snem i kit khunrei san ngut, u lok u lah iap. I bsa ia ki khun da kaba jied mawsleit ha ki par dewiong bad kamai kumba 300-400 tyngka ha ka shi sngi. Ha ka jinglap u nongthoh khubor ine i kong i dang shu dep mih na ka hospital sorkar NEIGRIMS. “u doctor u ong wan biang hynrei ngam don ei ei shuh ha ka pla, ngi ia im tang namar dang don u khaw reshon. Ngim sap ei ei shuh, don sa tang ka ing thylli,” ong I kong Pohtmi
Ha Moopala, bun ki kynthei ki shah ia ka jingjynjar namar ki dei ki nongbsa bad nongkit ia ka ing. Ka kong Syrti ka la iathuh ba ka kamai 700-800 tyngka shi sngi da kaba jied mawsleit. Ha ka jingjurip u nongthoh khubor, kine ki kynthei ki kamai kata kaba rit eh kadei 400 tyngka shi sngi. Kane ka shnong Moopala ka don palat 80 ing, hynrei palat 50 ing dei ki nongbylla dewiong bad bun ruh na ki dei ki kynthei kiba im da kaba jied mawsleit. Katkum ka jingiathuh kine ki kynthei, kiba bun ki longing baduk na kane ka shnong ki lah phah ia ki khun sha sor ban leit shong bylla ing briew. Ki la iathuh shuh shuh ba lah don ki jingjia ha kaba ar ngut shi para ki la kyllon ha skul namar ba kim don ja ban bam ha ing. Kine ki khynnah skul ki lah bam tang da u jhur bad u suji.
Ha ka jingiakynduh u nongthoh khubor ia ki katto katne ki malik heh ha Sutnga, ki la pyni ia ka jingeh bad ki la iathuh ba ki baduk ki wan ban pan bylla na ki man ka sngi. La iathuh ruh lyngba kine ki rangbah ba ha ka jingialang jong ka synjuk ki rangbah shnong jong ka East bad West Jaintia ba dang shu dep ha ka palei ba la lah, la rai ba ka synjuk kan thoh noh da ka shithi sha u myntri rangbah ka jylla u Dr Mukul Sangma.
Ha kaba iadei bad u khaw reshon pat kine ki longing baduk kiba don ha Rymbai bad ha Moopala kaba hap ha East Jaintia Hills district, ki la iathuh ba ka jingioh khaw reshon ka long tang 10 kilo ne 15 kilo ha ka shi bnai. Don ruh ki longing kiba don khun 12 ngut bad ki ioh tang 15 kilo ha ka shibnai. Ha Moopala, I wei I longkmie I bym kwah ban pynpaw kyrteng I la iathuh ba ka shini reshon lei lei ym ju iohi ha u snem 2013. Haba kylli ia ka jingdon ki card reshon, bun na kine ki longing kim tip la ki don card reshon ne em.
Phi don ban ong eiei?