Shillong, 16 Nailar:
U Myntri Rang bah ka jylla u Dr. Mukul Sangma ha kane ka sngi Nyngkong u la plie ia ka skulbah ban hikai put hikai tem ne ka Centre of Excellence ha ka Indian Classical bad ka Western Music ha Shillong bad ha Tura ha ka jingialang kaba long ha U Soso Tham Auditorium, Shillong.
Ha kane ka sngi la don lang u Symbud Myntri Rangbah Bah Rowell Lyngdoh, Myntri kam pohiing ka Kong Roshan Warjri, u DGP u S.K. Jain, u Principal Secretary ka Arts bad Culture, u P. W. Ingty bad ka Director ka Arts bad ka Culture, Kong Matsiewdor W. Nongbri ha ka jingialang kaba la pynlong da ka tnad Arts bad Culture ka jylla.
Haba kren ha kane ka sngi, u Dr. Mukul Sangma u la ong ba kine ki jaka hikai ha Shillong bad ha Tura kin long kum ki shlem ban saindur ia ki samla ha ka sap siaw sap rwai. ”Ka Meghalaya kan long ka jaka ban kem ia ki sap jong ki samla ban sei ia ki Guru ha ka siaw ka rwai”, la ong u Myntri Rangbah.
Kine ki jaka kin long ban pynlah ia ki paidbah ba don sap ha ka jylla ban shut reng ia ki ha kane ka kam bad bynrap ba ka Meghalaya ka dei ka jylla ha kaba katto katne ki nongmuna ki la don lypa ha ka tem ka put. “Da ka jingplie ia kine ki jaka hikai, ka nongbah Shillong kan long ka jaka ban iakren bad ka lynti jong ka put ka tem bad ka karkhana ka siaw ka rwai. Ngim nym long kiba jop ha kane ka bynta hynrei ngin lah ban sei ruh ban leit hikai shabar ha ki sngi ban wan”, u la ong.
Ha kane ka sngi, la pynshong shit da ka jingrwai ri sepngi bad ka sur na ri India na ki nongrwai bad nongtem bapher bapher.
Phi don ban ong eiei?