Shillong, 14 Nailur:
Ka Division Bench kynthup ia u nongbishar TNK Singh bad u nong bishar SR Sen ka High Court ka Meghalaya ka la pynlait ia u Krishna Bahadur Thapa uba shah kem ha ki pulit halor ka jingkynnoh donkti ban kit ia ki drok ba la mana ha ka kali sha Mizoram ha ka 8 tarik Lber, 2011.
Haba pynmih ia ka hukum ban pynlait ia u Thapa, ka Division Bench ka la pynmih ia ka hukum ha ka 12 tarik Nailur bad ka la buh jingkylli ia ka rukom tohkit kaba bakla bad kaba leh khnang ne kaba shu leh khlem ka jingtip.
Ki pulit hadien ba la ioh ia ka jingtip kaba thikna, ki pulit ki la pynlong ia ka jingpynap shrip ia ka kali MZ 01 F 3632 bad MZ 01 F 7535 ba niah da u Thapa bad u L Varte ha Luckier Road, Shillong shwa ba kin iaid sha Mizoram kiba kit ia ki drok.
Kawei ka kynthei kaba shong lang ha katei ka kali ba niah u Thapa ka la shah kem lang.
Baroh ar tylli kine ki kali, la rah sha Lumdiengjri Police Station, bad hadien kane, la rah sha Additional S.P (Crime) ia ki synduk ba thep ia ki drok ba ioh kurup na ka kali (MZ 01 F 7535) kiba dei ki drok ba la khang pyrshah bad ki tiar injek.
Ki pulit hadien ba la pynlong ia ka jingtohkit ki la thep mukotduma ia kane ka kam ha ka kashari jong u Special Judge, Shillong Under section 22 (C) ka NDPS Act.
Shwa ia kane, ka Special Judge(NDPS) ka kong B.Giri, Shillong ka la rai pynrem ia u K.B Thapa bad la hukum ban set along 10 snem bad lada ym siew ia ka kuna yn shong tam sa shi snem, bad ka Lalimpuii Khiangte ka la shah pynngat ha ka kyndon 27 NDPS Act hynrei la pynlait noh hadien ba ka la shah set lypa la 2 snem katba u LalboroleVarte la pynlait.
U nongsaid ain jong u K.B.Thapa, u M.F.Qureshi u la pynpaw ia ka jingsngew hun ia ka rai jong ka High Court bad ong ba ka hok ka dang ieng. Na ka bynta ka sorkar, la mihkhmat da u K.Khan uba dei u Addl. Govt Advocate ka sorkar.
Phi don ban ong eiei?