Shillong, 14Nailur:
Ha ka sngi saitjain, Ka Meghalaya Editors and Publishers Association (MEPA) ka la pynkup burom ia u Editor ka Kot Khubor ‘U Nongsain Hima’, u Bah Lambok Thabah namar ka jingioh pdiang jong u ia ka khusnam Ramnath Goenka Excellence in Journalism Award, kaba la ioh pdiang na ka Indian Express ba la sam ha nongbah Delhi.
Ka jingialang pynkup burom ka la long ha Mini Hall ka Khasi National Dorbar Hall ha kaba la ia donlang ki dkhot ka MEPA, ka Shillong Press Club, ryngkat kiwei pat ki nongthohkot. Ia katei ka jingialang la pyniaid da u Bah Philip Marwein, General Secretary ka MEPA, bad la pynkuop burom ia u bah Lambok da kaba pynkup jain ryndia.
Ki nongkren ha kane ka jingialang, kynthup ia u Dr KK Jhunjhunwala na ka Kot Khubor Eastern Panorama, u Thomas Lim na ka Meghalaya Times, Bah P. Sohkhlet na ka liang ka Shillong Press Club, Bah BP Domes na Dongmusa, Bah RM Shabong na ka liang ka MEPA bad Bah Morning Star Sumer na ka liang ki nongthoh, ki la pynpaw ba kane ka jing ioh khusnam u Bah Lambok, ka long ka jingithuh ka ri India ia u synniang jong ki kot khubor Khasi, kiba bunsien ka sorkar ne ki briew ha kane ka jylla kim sngewthuh satia ia ka jingtreikam bad ka jingshakri ki kot khubor Khasi, hynrei kiba bun ki shu nap tang ban bein.
Kinongkren ki la kren ai mynsiem ba katei ka khusnam ka dei tang ka jingsdang ia ki kot khubor Khasi bad kam dei kaba khadduh Baroh ki nongkren ki la kyrkhu kyrdoh ia u Bah Lambok bad ia u Nongsain Him ba kin nang lah ban trei khambha ha kaba shakri ia ki paidbah.
U Bah Lambok u la pynpaw ka jingsngewkmen bad sngewnguh ia ka MEPA kaba la pynlong ia kane ka jingialang pynkup burom, kaba u ong ka long kaba kordor shibun. U la ong ruh ba ki jingialang kiba kum kine kin ai mynsiem ba ma u ryngkat ka kynhun u Nongsain Hma kin nang lah ban trei khambha shuh shuh ia ki por ban wan ban shakri ia ki paidbah lyngba ka jingai jingtip da ki khubor kiba tei ia ka imlang ka sahlang jong ka jylla baroh kawei.
Phi don ban ong eiei?