Shillong,11 Naitung:
Ka jingpynrung kyr teng na ka bynta ki nongioh jingmyntoi na ka Chief Minister’s Social Assistance Scheme ka dang iai bteng bad ia katei ka prokram la pynlong mynta ka sngi sa ha Umsning, Ri-Bhoi District ha kaba u Myntri Rangbah ka jylla u Dr.Mukul Sang ma u la ia donlang uba long ruh kum u kongsan.
Ha katei ka ingialang kaba la long ha Umsning la ia donlang ruh u Dr C Lyngdoh, Parliamentary Secretary uba dei ruh u MLA ka Umsning, la donlang u Ma Ngaitlang Dhar Chairman ka Meghalaya Commission on Resource Mobilisation bad u bah H M Shangpliang, Director Social Welfare nalor kiwei pat.
Ia katei ka Chief Minister’s Social Assistance Scheme la wanrah paidbah ha u 2012 ha Asanang , West Garo Hills. Hapoh katei ka skhim ka sorkar ka iarap pisa T.500 tyngka shibnai sha kiba dei ban ioh jingmyntoi. Kam don kano kano ka jingbuh rta na bynta kito kiba duna dkhot met bad ki thei iaplok, hynrei tang kito kiba dei ban ioh ia ka bai bam tymmen ki dei ban don 58 snem shaneng na bynta ki kynthei katba 60 snem shaneng na bynta ki shynrang. Ban pynphriang ia ka jingtip sha ki paidbah na bynta katei ka skhim bad kumjuh ruh ban pynrung kyrteng ia kiba die ban ioh jingmyntoi la pynlong ia ka jingpynrung kyrteng naduh ka 3 tarik u naitung haduh ka 16 tarik mynta u bnai.
Haba kren ha katei ka jingialang paidbah, u myntri rangbah ka jylla u Dr.Mukul Sangma u la ong ka jingthmu ba la wanrah ia katei ka skhim ka dei namarba ka sorkar ka thmu ban pyndep ia ka jingangnud jong ka ban shakri paidbah bad kumjuh ruh ban wanrah ia ka roi ka par.
U Dr Sangma u la ong ruh ba hapoh katei ka skhim ym donkam ia uno uno u briew ba un hap ban dei na ka longing kaba duk ne BPL hynrei ka long salonsar ia baroh.
U la ong ba la pynlong ia katei ka prokram khnang ba kiba dei ban ioh jingmyntoi baroh ki dei ban ioh lut lyngba katei ka skhim.
U Dr.Mukul u la ong ruh ba ka sorkar jylla ka pyrshang ban shim ia ki lad ki lynti, ban kyntiew ia ka ioh ka kot ha ki thian nongkyndong, u la pynkynmaw ruh ba ka sorkar ka don ka jingthmu ban kyntiew ha ka kam ri jingri ha ki lai tylli ki block ha Zikzak, Betasing bad Selsella ha Garo Hills bad lai tylli ki block ha Khasi Jaintia Hills kitei ki blok ki kynthup ia ka Mylliem, Umsning bad Mawryngkneng.
U myntri rangbah u la ong ba hapoh katei ka skhim 5000 tylli ki longing la buh thong ba kin sdang ia ka kam pynmih dud ha ka jylla.
Ha ka juh ka por u Dr.Mukul u la pynbna ba yn thaw ia ka blok thymmai ha Umroi ban peit ba ka jingtreikam ka sorkar kan kham jan bad ki paidbah.U Dr.Mukul u la sam ia ki phom sha ki paidbah ba dei ban ioh jingmyntoi.
Phi don ban ong eiei?