Shillong,17 Jylliew:
Uwei u rangbah bym shym la ithuh myn ta ka janmiet u la shah bom shnong ha ki nong shong shnong ka Maw myrsiang, kaba hap hapoh ka Sohra Police Station, na ka daw ka jing suba Menshohnoh. Ki paidbah ki la ipher ia ka rukom iaid rukom ieng utei u rangbah uba la iaid ha ki lum ba ki nongap masi ki dang pynbam phlang ia ki masi jong ki, bad namar ba u dei u riew nongwei u bym shym la ithuh ki la kynnoh ba u dei u Menshohnoh bad ki la bom shnong shnong ia u.Utei u rangbah u la mynsaw jur, la pynkit ia u sha Swer PHC hynrei kham hadien la pynkynriah noh sha Civil Hospital Shillong.
U SP ka East Khasi Hills u bah M.Kharkrang u la iathuh ba hadien ba la ioh jingtip shaphang katei ka jingjia ka kynhun ki pulit n aShillong bad na Sohra bad kumjuh ruh ki Majistor ki la hiar kyrkieh sha ka shnong bad ki la lah ban pyllait im ia utei u rangbah na kti ki paidbhur. U SP u la iathuh ba katei ka jingjia ka la jia ha ka por 5 : 40 baje janmiet.
Kham hadien, ki pulit ki la kem 11 ngut ki rangbah na katei ka shnong bad kawei ka longkmie, kiba la shah kem ki kynthup ia u Rangbah Shnong bad u Secretary shnong ka Mawkyrsiang , ki pulit ki ong ba katei ka jingleh ki nongshong shnong ka Mawmyrsiang ka dei kaba be-ain bad ki pulit ki maham ruh ba kum katei ka jingngeit biej kaba wanrah ia ka jingpynkhein ain, ka long pyrshah ia ka ain.
Phi don ban ong eiei?