Shillong,7 Naitung:
Hadien ka jingkhyn ra Trading License ka KHADC ha Iew, mynta pat sa ka seng ki nongshna phlim Khasi ki la kyndang ia kito ki dukan kiba thep phlim bad jingrwai Khasi, ia katei ka jingkyndang ka Joint Action Committee ki nongshna phlim ka la sdang shuwa na ki bynta ka Iew Mawlong.
Ka JAC ki Meghala ya Film makers Association kaba kynthup ia ki nongshna phlim Khasi bad Jaintia,ha ryngkat ka jingsynran lang da ki pulit ka Cantonment Board bad kumjuh ruh ki CRPF, ki la leit sha ki dukan Kompiwtor ha ki bynta ka iew Mawlong. Ha katei ka jingkhynra ba nyngkong ki la ioh ban kurup saw tylli ki dukan kiba ju mlien ban die sha ki paidbah ia ki jingrwai bad phlim Khasi lyngba kaba thep sha ki Memory Card ki Mobile jong ki.
Ka JAC kaba la leit lang bad ki pulit mynta ka sngi ki la kurup ia ki Pendrive, ki Mobile ba pyndonkam ki nongshong dukan ban die thep phlim, bad la kem ruh ia saw ngut kitei ki briew ba shong ha kitei ki dukan.
Shuwa ban pynlong ia katei ka jingkhynra, ki nongialam ka JAC ki la leit ban ia syllok shuwa bad ki pulit bad hadien kata ki la ia mih khrui na Cantonment Beat House ban leit khynra ia kitei ki dukan kiba die be-ain ia ki phlim Khasi. Tang ia mih na Cantonment Beat House ki pulit ryngkat ka JAC ki la ioh ban kurup shuwa ia kawei ka dukan kaba don mar pyrshah bad katei ka thanad pulit, bad nangta ki la ioh ban kem sa ia kawei kaba don ha Police Point, Iewmawlong, kawei pat la ioh kem na Iewmawlong hi bad sa kawei pat la ioh kem na Iewduh.
Haba ia kren bad ki nongialam ka JAC ba kynthup ia u bah Commander Shangpliang, u President ka Meghalaya Film Makers Association, u la maham tyngeh ia kito ki dukan thep jingrwai ne phlim ba nangne shakhmat kim dei shuh ban die ia ki jingrwai bad phlim Khasi, u la maham ruh ia ki paidbah ba kim dei ban thep phlim Khasi ha ki mobile jong ki da katei ka rukom tuh, u la kyntu ia ki paidbah ba ki dei ban pyntip sha ka JAC lada ki lap ba don ki dukan kiba leh pyrshah.
Lah ban pynkynmaw ba katei ka dei ka mat kaba ki nongshna phlim Khasi ki ju pynpaw , ba ka jingdie tuh ia ki phlim bad ki jingrwai Khasi ka la wanrah ia ka jingduhnong kaba khraw ia ki nongshna phlim , bad kaba long ruh kum ka jingkhanglad ia ki ban bteng ia katei ka kam shna phlim.
Kham hadien la ioh jingtip ba kiba shah kem ha katei ak jingdie tuh ia ki phlim khasi ki dei u Vicky Mishra bad u Donbor Marbaniang, ki pulit ki kurup noh ia ki kompitor jong ki.
Phi don ban ong eiei?