Shillong, 17 Nailar:
Ka Khasi Jaintia National Union (KJNU), Women Wings, ha ka kyrwoh ba la phah da ka kong Suk Dhar Organising Secretary ka pynpaw ia ka jingsngewkhia bad sngew lehrain haduh katta katta namar ka jingnangjur ki kam awria hapoh Ri Lum Jiantia.
“Ka seng ka la ioh shibun eh ki jingujor na u paidbah halor ki kam awria”, la ong ka Kong Dhar.
Ka la ong ba ka seng KJNU WW ka maham jur da kaba tyngeh ia ki briew kiba donkti ha ki kam awria, khamtam ia kito ki briew kiba don kti bad leh ia kane ka kam ha kaban khaii ia ki khynthei khynnah da kaba phon bapah bad pynbiej ia ki ha ki ba bun ki rukom khamtam ban kamai pisa da kaba leh ia ki kam awria.
Ia kum kine ki briew kiba pynjah burom ia ka shnong ka thaw bad ia ka jaitbynriew hi baroh kawei ka seng lada ka lap ia kum kine ki briew ki bym burom shuh ia ka jinglong bad ka akor, ka seng kan ym ai lad da lei lei ruh ia ki, kan pynshitom ia ki da kaba tyngeh.
Shuh shuh ka seng ka kyntu lang ia ki bor shnong bad ki bor jong ka ain ban iatrei lang ban pynduh jiat shi syndon ia kum kine ki jait kam bad kin wad ki lad ki lynti ban tehlakam ia kum kine ki jaitkam ki bym iahap satia ha ka imlang ka sahlang, namar na ki jingle jong ki briew ia kum kine ki kam ka wanrah ia ki jait jingpang ba ma haduh katta katta bad kiwei kiwei de ki jingsniew.
Phi don ban ong eiei?