Shillong, 12 Rymphang:
Mar ia pynmih khubor U Rupang, ba U bah HS Shylla, un lah ban ialeh elekshon MDC na Nongkrem, ha kane ka kynti, kaba mynta, ka la mih syndon bluit ka Nongkrem Constituency People’s Committee (NCPC) bad katei ka CNPC, kan pynlong ia ka jingialang paidbah jongka, ha ka sien ba nyngkong eh, ha ka 22tarik Rymphang 2016, ha ka por 11baje mynstep ha Madan Smit.
Ha ka kot lyngkdop, ba la pynmih paidbah mynta ka sngi, ba la sei da U bah Hilarius Warbah Chief Spokerson, U bah Than Sing Kharumnuid Chairman, Bah Teibok Kurkalang Vice Chairman, Bah Hillmon Kharsohnoh Vice Chairman, Bah Teiskhem Kharsati, bah Eric Syiemlieh Organising Secretery bad U bah Rony Tariang Treasurer, la pyni halor ki jingeh ba ka jaitbynriew ka ia kynduh bad halor ka rai jong ka kashari, ha kaba iadei bad ka iktiar jong ki Rangbah Shnong.
Nalor ba ka seng, ka iaroh ia ka UDP, ka KHNAM, ka iaroh ruh ia U bah PN Syiem, CEM KHADC, uba ieng skhem triang ban ialeh pyrshah ia ka rai jong ka Meghalaya High Court. Ka seng, ka ong shuh shuh “Mangi pat kum ki nongshong shnong jong ka Nongkrem MDC Costituency, ngi la kylla long khlem MDC, kum ha kane ka por!”.
Ha katei jingialang paidbah, U bah HS Shylla, uba la long teng U MLA/MDC bad ruh U CEM jong ka KHADC, ha ki snem 2004-2007, un don ban kren halor kine kiei kiei bad ka seng, ka ia wer ia ki paidbah, ba kin ia poi khnang sha katei ka jingialang.
Phi don ban ong eiei?