Shillong, 16 Nailar:
U Myntri ka tnad Departmen of North Eastern Region (DoNER) u Dr Jintendra Singh u la leit iuhkjat mynta ka sngi ha ka sien ba nyngkong ha jaka u Syiem ba khraw ka jaitbynriew Khasi, u Syiem Tirot Sing Syiem ha Nongkhlaw.
Ha kane ka sngi kaba ka BJP ka la pynlong ia ka prokram kyrpang ban kynmaw bad ai burom ia une u riew shlur, la sakhi da ki paidbah byllien ba la don lang u Syiem ka Hima Nongkhlaw u Paiem P Syiem nalor ki riew rangbah bad kiba haiing hasem jong ka longiing jong u Syiem Tirot Sing.
“U Tirot Sing Syiem u dei u riew khraw ba khlem ioh ia ka jingkyntiew nam ha ka rukom kaba dei (unsung hero)”, la ong u Dr Jitendra Singh haba kren ha kane ka sngi.
U la ong ba ka BJP ka la shim ia kane ka lynti ban kynmaw bad leh burom kyrpang ia ki riew shlur ka ri lyngba ka jingshemphang bad ka jingtbit jong u Myntri Rangbahduh ka ri u Narendra Modi.
“U Tirot Sing Syiem u dei u nongrah jingshai ia ka jingialeh laitluid ka India pyrshah ia ka jingsynshar ka sorkar Bilat. U dei u nonglam lynti ym tang ia ka Dong Mihngi hynrei ia baroh kawei ka ri India”, la ong u Myntri ka DoNER uba la buh syntiew ha u mot jong u Tirot Sing bad aiti ruh ia ka jingthoh sahkynmaw sha kiba haiing hasem jong u Tirot Sing.
U la ong biang, “Shwa ba ka India kan iakhun ia ka jinglaitluid, u Tirot Sing u la dep iakhun naduh ka spah snem 19, kata shwa ba ka India kan pynbna ia ka War of Independence ha u snem 1857”.
“U dei u Riew Khraw jong ki Khasi”, la ong u Dr Jitendra Singh.
U la ai ksai ba ka sorkar ka lah ban pynrung ia ka khana jingiakhun bad ka jingim jong u Tirot Sing ha ki kot pule jong ki skul ha ka ri shi bynta ban kynmaw ia ka jinglenlada bad ka jingnoh synniang bad shakr jongu sha ka ri.
Ka jingkynmaw burom ka BJP ia ki riewkhraw ka ri ka long shi bynta ban rakhe ia ka jingdap 70 snem ka ri ban ioh laitluid na ka kti jong ka jingsynshar ki dohlieh ha kane ka ri. Naduh ka 9 tarik haduh ka 23 tarik Nailar ka BJP ka la pynlong ia ka “yaad karo kurbani” ha kaba ka leit ban buh syntiew bad kynduh ia kiba haiing hasem jong ki riew shlur kiba la lenlade iaka ri bad ha kane ka jylla, ka la buh syntiew ha u mot jong u Pa Togan Sangma jong ki Garo, bad kin leit buh syntiew ha u mot jong u Kiang Nangbah jong ki Pnar.
Ha ka 18 tarik, ka BJP Mahila Morcha kan leit kynduh ia ki shipai khappud ka India bad Bangladesh ban ai mynsiem ia ki ba la peitngor ban phikir iaka ri.
Ha ka 20 tarik kin leit buh syntiew ha u mot jong u Woh Kiang Nang Bah ha Syntu Ksiar, Jowai.
Katba ha ka 23 tarik, kan pyni paidbah ia ki phlim jong ka jingialehkai laitluid ha Khyndai Lad Shillong.
Phi don ban ong eiei?