Shillong 16 Jylliew:
U Myntri Rangbah ka jylla u Dr Mukul Sang ma u la ong ba ka sorkar jylla kam pat shim kano kano ka rai ban buh ia ka ktem ka ANVC (B) ha West Khasi Hills.
“Ka sorkar ka la pyn mih ia ka jingbthah ban wad ia ka jaka na ka bynta ban buh ia ka ktem jong ka ANVC )B) ha kiba bun ki district kynthup ha West Khasi Hills,”, la ong u Dr Sangma haba jubab ia ka jingkylli ba la wanrah da u MLA ka Mawlai Bah Embhahlang Syiemlieh hynne ka sngi hapoh ka iing dorbar thawain.
Haba jubab ia ka jingkylli bynrap, u Myntri Rangbah u la kubur ba ka Deputy Commissioner ka West Khasi Hills ka la thoh sha ka sorkar ba kam ioh ia ka jaka na ka bynta kane ka jingthmu.
Ha kajuh ka por, u Dr Sangma u la pynthikna ba ka sorkar kam nym iaid lait ia ka sur jong u paidbah. Shwa ia kane, u MLA ka Mawlai u Bah Embhahlang u la ong ba u pyrshah jur ia ka jingthmu ka sorkar ban buh ia ka ktem ka ANVC (B) ha Khasi-Jaintia Hills.
“Kaba bha eh ia ka sorkar ban buh ktem ia ka ANVC(B) ka long ha Garo Hills namar ba kane ka seng ka dei na Garo Garo”, la ong u Bah Syiemlieh.
U la ong ba ki paidbah ka Aradonga bad Athiabari ha West Khasi Hills ki sheptieng ba ka jingbuh ia kane ka ktem kan pynshlur ia ki samla ban pyniasoh sha ki seng lehnoh.
Phi don ban ong eiei?