Shillong,11 Naitung:
La iohi ba ki shipai mynta ki la sdang ban pynieng ia ki paia ban ker kut noh ia ka jaka shipai kaba don ha khap Lum mawbah, ia katei ka jingker kynroh ki shipai ki la sdang ruh ban tei ha ki jaka ba ki nong Lum mawbah ki ju pyndonkam ban ia lehkai bad ban saitjain.
U Rupang u la ioh ban ia kren bad u Rangbah Shnong ka Lummawbah u bah E.Thangkhiew halor katei ka bynta, kumno ka shnong ka sngew ia kitei ki jingker sainar. Haba ia kren bad u bah Thang khiew u la ong na ka liang ka bor shnong ka la ju ia kren na ka por sha ka por bad ki bor shipai ba kin pyllait ia ki kynroh na ka jaka ba ki nong Lum mawbah ki ju pyndon kam. “Man ka por ngi la ia kren, ki ong ngin sa ia peit shi sa ia peit, hynrei ka jingeh pat ka dei namar ba manla ka lai snem ki ophisar shipai ki ju kylla bad ka nang shim por, ngi la ia kren ia kane ha ka por ba u bah Pynshai M Syiem u la long u nongmihkhmat” ong u bah Thangkhiew.
U bah Thangkhiew u la ong ba haduh mynta naduh ba ki shipai ki la pynieng paia , kam pat don ka ingiakren na ka bor shnong, kaba haduh kine ki sngi ka dang iai ap lano ki shipai kin khot ia kren kumba ki la kular, “Ngi la don da ka jingmut ban shu leit pynsangeh ia katei ka jingker kynroh khnang ba kin khot ia kren noh” ong biang u bah Thangkhiew haba ia kren bad u Rupang. U la ong ruh ba shen na ka liang ka bor shnong kan ia shong pyrkhat halor katei ka kam.
U Rupang u la ioh ruh ban ia kren bad u bah Hamlet Dohling, u nongialam samla ka UDP uba dei ruh u samla na katei ka shnong uba la bat teng ia ka kam General Secretary ka KSU, u la ong ban a ka liang ka Party UDP ruh ka la thoh na ka por sha ka por sha ki bor shipai, “Ngi la thoh sha u R.Pan, u Colonel ki shipai, bad u la ong ba un sa pyntip da ka jingthoh, ngi la thoh sha u shibnai mynshuwa ba un pyllait ia ka jaka saitjain bad ka madan ia lehkai phutbol ki khynnah” ong u bah Hamlet Dohling. U bah Hamlet u la ong ba na ka liang ka shnong ruh ka ju kia kren borabor ia katei ka kam bad ki shipai, bad u la ong ba shen na ka liang ka seng UDP ruh kan sa ia shong pyrkhat bad ki bor shnong halor katei ka bynta.
Ha ka jingiakren bad ar ngut kitei ki riewkhmat ka Lummawbah, la sngewthuh ba ka jingker kynroh ki shipai ha ki khap ka Lummawbah ka wanrah jingeh ia ki paidbah nongshong shnong naba ha katei ka jaka ka don ka jaka saitjain bad ka madan ia lehkai ki khynnah.
Phi don ban ong eiei?